Qazaqstan aýmaǵyna ákelinetin balalar anımasıalyq fılmderi men otbasymen kórýge arnalǵan fılmderdi qazaq tilinde dýblájdaý úshin irikteý tártibi aıqyndaldy.
Mádenıet jáne sport mınıstrliginiń málimetinshe, qazir qazaq tilindegi kınokontetke suranys óte zor. Bul rette, Mınıstrlik qazaq tiline dýblájdanatyn sheteldik blokbasterlerdiń sanyn jyl saıyn arttyratyn boldy, dep habarlaıdy Almaty-akshamy.kz.
Qazaqparat tilshisine bergen jaýabynda mınıstrlik 2023 jyly 15 fılmdi dýblájdaý josparlanǵanyn aıtqan.
Keıingi 5 jyl ishinde «Meloman» kompanıasy Disney jáne Sony pictures kınokompanıalarynyń 17 fılmin dýblájdady. Sonyń ishinde, memlekettik qoldaýdyń arqasynda «Avatar» (birinshi bólim), «Qara qabylan: Vakanda jasasyn!» jáne «Avatar. Sý joly» fılmderi qazaq tiline dýblájdandy.
«Kınematografıa týraly» 2019 jylǵy 3 qańtardaǵy Zańyna sáıkes, prokatua shyǵýy shekteýli fılmderdi qospaǵanda, Qazaqstan aýmaǵynda kınozaldar men osy maqsattarǵa arnalǵan ózge de oryndarda prokattalýy jáne kórsetilýi qazaq tilinde júzege asyrylmaıtyn fılmder memlekettik tilde dýbláj jasalýǵa nemese sýbtıtrlenýge, sondaı-aq kadr syrtyndaǵy aýdarmamen qamtamasyz etilýge tıis. Atalǵan Zańnyń 13 babynyń 5-tarmaǵy 2 tarmaqshasyna sáıkes, «Ulttyq kınony qoldaý memlekettik ortalyǵy» komersıalyq emes aksıonerlik qoǵamy Qazaqstan aýmaǵyna ákelinetin balalar anımasıalyq fılmderi men otbasymen kórýge arnalǵan fılmderdi qazaq tilinde dýblájdaýdy qarjylandyrý jónindegi biryńǵaı operatory sanalady», - dep atalyp ótken vedomstvo málimetinde.
Fılmderdi qazaq tiline dýblájdaýdy qarjylandyrý týraly sheshimdi ýákiletti organ Saraptama keńesiniń oń qorytyndysy jáne Ulttyq fılmderdi memlekettik qarjylyq qoldaý máseleleri jónindegi vedomstvoaralyq komısıanyń usynymy negizinde qabyldaıdy. 2023 jylǵy 10 naýryzda Mádenıet jáne sport mınıstriniń «Qazaqstan Respýblıkasynyń aýmaǵyna ákelinetin balalar anımasıalyq fılmderi men otbasymen kórýge arnalǵan fılmderdi qazaq tilinde dýblájdaý úshin irikteý qaǵıdalaryn bekitý týraly» № 72 buıryǵy qabyldandy. Atalǵan buıryq Qazaqstan Respýblıkasynyń aýmaǵyna ákelinetin balalar anımasıalyq fılmderi men otbasymen kórýge arnalǵan fılmderdi qazaq tilinde dýblájdaý úshin irikteý tártibin aıqyndaıdy.
Budan buryn habarlanǵandaı, byltyr jalpy kınoprokattaǵy otandyq fılmderdiń úlesi shamamen 14,5 paıyzdy qurady.