Sýarý maýsymy bastalǵan sáýir aıynyń ózinde-aq 45 mln tekshe metr sý berildi.
Sáýir aıynyń sońynan bastap Qyrǵyz Respýblıkasy Qazaqstanǵa Talas ózeni arqyly taǵy 400 mln jáne Shý ózeni arqyly 180 mln tekshe metr sý jiberedi.
QR Sý resýrstary jáne ırrıgasıa mınıstri Nurjan Nurjigitov pen Qyrǵyz Respýblıkasynyń Mınıstrler kabıneti tóraǵasynyń orynbasary – sý resýrstary, aýyl sharýashylyǵy jáne qaıta óńdeý ónerkásibi mınıstri Baqyt Torobaev Shý jáne Talas ózenderindegi memleketaralyq sý sharýashylyǵy qurylymdaryn paıdalaný jónindegi qazaq-qyrǵyz komısıasynyń 35-shi otyrysynda osy jóninde kelisimge keldi.
Bul sý Jambyl oblysyndaǵy aýyl sharýashylyǵy alqaptaryn sýarýǵa jumsalady, dep habarlaıdy aqshamnews.kz.
Sonymen qatar taraptar qorshaǵan ortany qorǵaý jáne sý sapasyn baqylaý boıynsha birlesken jumys tobynyń qyzmetin talqylady.
Otyrysqa sondaı-aq Syrtqy ister mınıstrligi, Tótenshe jaǵdaılar mınıstrligi, Ekologıa jáne tabıǵı resýrstar mınıstrligi men Jambyl oblysy ákimdigi ókilderi qatysty. Komısıanyń teń tóraǵalary – QR Sý resýrstary jáne ırrıgasıa vıse-mınıstri Nurlan Aldamjarov jáne Qyrǵyz Respýblıkasynyń Sý resýrstary qyzmetiniń dırektory, mınıstr orynbasary Nurlan Jumaev.
«Byltyr qyrǵyz áriptesterimizben birlesken jumystyń arqasynda Jambyl oblysynyń dıqandaryn sýarmaly sýmen tolyq qamtamasyz ettik. Mysaly, Talas ózeni arqyly Qazaqstanǵa josparlanǵan 380 mln tekshe metrdiń ornyna 418 mln tekshe metr sý keldi. Al Shý ózeni arqyly 165,3 mln tekshe metr sý keldi, bul bir jyl burynǵy kólemmen salystyrǵanda 29,7 mıllıonǵa artyq»,– dedi QR Sý resýrstary jáne ırrıgasıa mınıstri Nurjan Nurjigitov.