Ulttyq kıno ortalyǵy jańa erejeniń 12 sáýirden bastap kúshine enetinin habarlady
Jańa ózgerister qamtylǵan buıryq 2024 jyldyń 12 sáýirinen bastap kúshine enedi, dep habarlaıdy Almaty-akshamy.kz.
Kınojobalardy irikteý eki kezeńde júzege asady. Birinshi kezeń – fılmderdiń senarıin (oıyn jáne anımasıalyq fılmder úshin) nemese senarı josparlaryn (derekti jáne hronıkaly fılmder úshin) qaraý. Ekinshi kezeńde taqyryptyq josparǵa saı keletin, Ulttyq kıno ortalyǵy janyndaǵy Saraptama keńesi iriktegen jobalardyń qujattaryn jınaqtaý júzege asyrylady. Qujattardy tapsyrǵannan keıin úmitkerlerge anyqtalǵan qatelerdi túzetýge 3 kún ýaqyt beriledi.
Kıno ortalyǵy qujat qabyldaý aıaqtalǵannan keıin talaptarǵa saı keletin ótinish berýshilerdiń qujatyn Saraptama keńesiniń qaraýyna jiberedi. Sodan keıin kınojobalardyń ashyq qorǵaý (pıchıng) kúni belgilenip, úmitkerlerge pıchıngti ótkizý ýaqyty qosymsha habarlanady. Pıchıng ashyq formatta ótkiziledi jáne Saraptama keńesi ár kategorıa boıynsha ádil sheshim shyǵarýǵa yqpal etedi.
Ortalyq Saraptama keńesiniń qorytyndysyn vedomstvoaralyq komısıanyń qaraýyna engizedi.
Konkýrstyń barlyq kezeńderine qatysty aqparattar ortalyqtyń ınternet-resýrsynda jáne áleýmettik jelilerindegi resmı akkaýnttarynda qoljetimdi bolady. Bul sharalar memlekettik qoldaýǵa ıe bolatyn kınojobalardy irikteýdegi ashyqtyqty qamtamasyz etpek.