Kóliktegi polısıa departamentiniń qyzmetkerleri kez kelgen quqyq buzýshylyqqa “múldem tózbeýshilik” qaǵıdaty boıynsha profılaktıkalyq is-sharalardy turaqty negizde júrgizedi.
Jyl basynan beri elimizdiń áýe jáne temirjol kóligi obektilerinde qoǵamdyq oryndarda adamdardyń mazasyn alyp tıiskeni úshin 2841 túlǵa ákimshilik jaýapkershilikke tartylǵan, onyń ishinde 529-y zańsyz taksı júrgizýshisi.
Máselen, osy jyldyń 11 qyrkúıeginde Astana qalasy áýejaıyndaǵy jelilik polısıa bóliminiń qyzmetkerleri kelýshi jolaýshylardyń mazasyn alyp, jeke tasymaldaý qyzmetin usynǵan 40 jáne 57 jastaǵy qala turǵyndaryn anyqtap, ustady. Quqyq buzýshylar qoǵamdyq oryndarda tıiskeni úshin ákimshilik jaýapkershilikke tartyldy.
– Jurtshylyq pen týrıser júrgizýshilerdiń dóreki ári adamnyń mazasyn alyp tıisetin minez-qulyqtaryna narazy. Osyǵan deıin zańsyz tasymaldaýshylardyń sheteldik azamattardy áýejaıdan mejeli baratyn jerine deıin ádeıi kóterilgen joǵary baǵamen tasymaldaǵan jaǵdaılary bolǵan. Árıne, mundaı oqıǵalardan keıin elimizge kelgen sheteldik qonaqtarda jaǵymsyz pikir qalyptasady. Mundaı faktiler eshqashan nazarymyzdan tys qalǵan emes, quqyq buzýshylar mindetti túrde tıisti jaýapqa tartylady, – dedi PD bastyǵy Baqytjan Malybaev.
Esterińizge sala keteıik, qoǵamdyq oryndarda adamdardyń mazasyn alyp tıiskeni úshin eskertý nemese 5 AEK mólsherinde aıyppul qarastyrylǵan, osy quqyq buzýshylyqty qaıtalap jasaǵan jaǵdaıda 10 AEK mólsherinde aıyppul nemese bes táýlikke deıingi merzimge ákimshilik qamaýǵa alý kózdelgen. Sheteldikter úshin mundaı quqyq buzýshylyq úshin 5 AEK aıyppul, qamaýǵa alý nemese QR sheginen tysqary shyǵarý kózdelgen.