Bıylǵy 7 aıda jol erejesin buzýdyń 4 mln-ǵa jýyq jaǵdaıy anyqtaldy. Bul týraly QR İİM Ákimshilik polısıa komıteti tóraǵasynyń orynbasary Serik Túsipov aıtty, dep habarlaıdy almaty-akshamy.kz QazAqparatqa silteme jasap.
«Jyl basynan el joldarynda 7 180 jol-kólik oqıǵasy tirkelip, onyń saldarynan 1 017 adam qaza bolyp, 9 533 adam túrli dene jaraqatyn aldy», - dedi S. Túsipov.
Onyń aıtýynsha, joldaǵy qaýipsizdiktiń aıqyndaýshy faktory retinde burynǵysynsha júrgizýshilerdiń tártibi qarastyrylyp otyr.
«Bıylǵy 7 aıda jol erejesin buzýdyń 4 mln-ǵa jýyq jaǵdaıy anyqtaldy. Onyń ishinde jyldamdyqty asyrýdyń 1,4 mln faktisi tirkeldi», - dedi vedomstvo ókili.
Belgili bolǵandaı, osy jyly jol belgileri talaptary men tańbalardy elemeýdiń 1 myńǵa jýyq oqıǵasy anyqtaldy. Budan basqa, 13 myńnan astam júrgizýshi avtokólikti mas kúıinde basqarǵany úshin ustaldy.