11 jeltoqsanda Armenıa astanasy Erevan qalasynda Junior Eurovision 2022 halyqaralyq án baıqaýy ótedi. Bıyl bul óner báıgesinde Qazaqstan namysyn «Baqytty Bala-2022» IV halyqaralyq baıqaýynyń fınalısi Davıd Charlın qorǵaıdy. Kórermender baıqaýdyń Grand-fınalyn 11 jeltoqsan kúni saǵat 21:00-de «Habar» telearnasynan tamashalaı alady, dep habarlaıdy Almaty-akshamy.kz.
Davıd Charlın bul jobaǵa arnaıy jazylǵan «Jer – Ana» atty jańa kompozısıany oryndaıdy.
Qazaqstan osynaý álemdik án dodasyna osymen besinshi márte qatysady. Bul joly elimizden basqa eýropalyq 15 memlekettiń jas ánshisi baq synaıdy. Qazaqstandyq jas ánshilerdiń jyl saıyn Junior Eurovision baıqaýyna qatysýy «Habar» Agenttiginiń 2016 jyly Eýropalyq Habar taratý odaǵyna (EVU) múshelikke qabyldanýynyń arqasynda múmkin bolyp otyr.
Eskeretin bir jaıt, nátıjesi Ulttyq júrıdiń baǵalaýy jáne ortalyqtandyrylǵan ǵalamdyq onlaın-daýys berý qorytyndysy boıynsha shyǵarylady. Ónerpazdarymyz Ulttyq júrıden eń joǵarǵy baǵa alǵanymen onlaın-daýys berýdegi belsendiliktiń tómendiginen bas júldeni ıelene almaı qalyp júr. Máselen, 2019-2020 jyldary Erjan Maksım men Qaraqat Bashanovanyń elimizge jeńis syılaýyna onlaın túrde beriletin sanaýly ǵana daýys jetpeı qalǵan bolatyn. Sondyqtan uıymdastyrýshylar otandyq ónerpazymyzǵa onlaın-daýys berýde belsendi bolýǵa shaqyrady.
Davıd Charlınge daýys berý úshin:
- https://junioreurovision.tv/ nemese https://jesc.tv/ siltemeleri arqyly saıtqa kirý;
- tizimnen Davıd Charlındi tańdaý;
- «Daýys berý» batyrmasyn basý.
Daýys berýdiń alǵashqy kezeńi Astana ýaqyty boıynsha 10 jeltoqsan kúni saǵat 01:00-den bastalyp, 11 jeltoqsan kúni saǵat 20:59-da aıaqtalady. Ekinshi kezeńde daýys berý Astana ýaqyty boıynsha 11 jeltoqsan kúni barlyq qatysýshylar óner kórsetip bolǵannan keıin 15 mınýt ishinde ǵana qoljetimdi bolady. ⠀⠀⠀⠀⠀
Eske salsaq, 2018 jyly bul baıqaýǵa Qazaqstan atynan alǵash bolyp jas ánshi Danelıa Týleshova qatysyp, 6-oryndy ıemdengen bolatyn. 2019 jyly jalpy daýys berý nátıjesinde Erjan Maksım 2-júldeli orynǵa ıe boldy. 2020 jyly Junior Eurovision baıqaýynda Qaraqat Bashanova da 2-oryndy ıemdendi. Byltyr Qazaqstannan Beknur Jánibekuly men Álınur Hamzın qatysyp, 19 eldiń ishinen 8-orynǵa turaqtaǵan.