Bıyl Astana–Almaty, Atyraý– Astrahan, Aqtóbe–Qandyaǵash jáne Taldyqorǵan-Óskemen avtojoldarynyń boıynda qozǵalys tolyq ashylady.
Bul týraly Kólik mınıstri málimdedi, dep habarlaıdy Almaty-akshamy.kz.
Ótken demalys kúnderi Marat Qarabaev jumys saparymen Aqtóbe, Atyraý jáne Batys Qazaqstan oblystarynyń mańyzdy kólik ınfraqurylymy nysandaryn aralady.
Senbi kúni Kólik mınıstrliginiń basshysy Aqtóbe oblysynyń turǵyndarymen kezdesý ótkizip, azamattardy jeke qabyldady. Sonymen birge Álıa Moldaǵulova atyndaǵy halyqaralyq áýejaıdyń jáne Aqtóbe men Qandyaǵash temirjol vokzaldarynyń jumysymen tanysyp, «Aqtóbe-Qandyaǵash» jáne «Qandyaǵash-Maqat» avtojoldaryndaǵy qaıta jańartý jumystarynyń barysyn baǵamdap qaıtty.
Sondaı-aq mınıstr joldardy qaıta qurý jobalarynda kózdelgen 22 jańa kópir men jol ótpeleriniń qurylysyn tekserip, merdiger uıymdarmen birneshe jınalys ótkizdi. Marat Qarabaev qurylysshylarǵa joldardy paıdalanýǵa berý týraly halyqqa berilgen ýádeni merziminde oryndaý kerektigin eske saldy.
Jeksenbide vedomstvo basshysy Atyraý oblysynyń ákimshilik ortalyǵyn Kaspıı teńiziniń porttarymen baılanystyratyn «Oral-Kaspıı kanalynda» bolyp, Atyraý qalasynyń temir jol beketine bardy. Sonymen qatar «Atyraý-Astrahan» avtojolyn qaıta jańartý boıynsha júrgizilip jatqan jumystardyń barysymen tanysty. Dúısenbi kúni Marat Kárimjanuly Batys Qazaqstan oblysyndaǵy «Kaztalovka–Jánibek–RF shekarasy» jáne «Ónege–Bısen–Saıqyn»avtojoldaryndaǵy kúrdeli jóndeý jumystaryn tekserdi.
Jumys saparynyń qorytyndysy boıynsha kólik mınıstri BAQ ókilderiniń respýblıkanyń kólik ınfraqurylymynyń negizgi jobalaryndaǵy jumystardyń aıaqtalýy týraly suraqtaryna jaýap berdi.
Marat Qarabaev elimizde buryn-sońdy rekonstrýksıa, kúrdeli jáne ortasha jóndeý jumystary júrgizilgen 856 shaqyrym jol paıdalanýǵa beriletinin habarlady. Onyń aıtýynsha, bıyl qurylys-montajdaý jumystarymen jalpy 11 myń shaqyrym qamtylǵan.
«Halyq tarapynan birneshe avtojol jobasyna qatysty alańdaýshylyq týyndap otyr. Olardyń qatarynda, Taldyqorǵan-Óskemen, Astana-Almaty, Aqtóbe-Qandyaǵash jáne Atyraý-Astrahan joldary bar. Bıyl atalǵan avtojoldardyń boıynda qozǵalys tolyq ashylatynyn atap ótkip keledi. Kelesi jyly bul jobalar tolyǵymen aıaqtalyp, halyq ıgiligine paıdalanýǵa beriledi», - dedi mınıstrlik basshysy.
Sondaı-aq ol oblys turǵyndary jıi kóteretin «Oral-Kaspıı kanalynda» túbin tereńdetý jumystaryn júrgizý týraly suraqqa jaýap berdi.
«Biz oblys ortalyǵynan ótip jatqan Oral ózeniniń Kaspııge quıatyn jerinde jumys júrgizýimiz kerek. Tıisti búdjettik ótinimdi Premer-Mınıstr qoldady. Sondyqtan biz tereńdetý qajet jerlerdi kórýge keldik. Olardyń jalpy uzyndyǵy 11 shaqyrymdy quraıdy. Bıyl jáne keler jyly atalǵan baseındi sáıkestendirý boıynsha úlken jumystar bastalady», - dedi mınıstr.