Fıtomelıorasıa jumysy
Ekologıa, geologıa jáne tabıǵı resýrstar vıse-mınıstri Álıa Shalabekova jumys saparymen Qyzylorda oblysyna baryp, Aral teńiziniń qurǵaǵan tabanyndaǵy fıtomelıorasıa jumysymen tanysty, dep habarlaıdy Almaty-akshamy.kz.
Esterińizge sala keteıik, Prezıdent Qasym-Jomart Toqaev 2021-2025 jyldar aralyǵynda Araldyń tabanynda 1,1 mln ga aýmaqta aǵash otyrǵyzý mindetin qoıdy.
Tapsyrmaǵa sáıkes, Qyzylorda oblysynda orman sharýashylyǵy jáne janýarlar dúnıesi komıteti, sonymen qatar orman mekemeleriniń kúshimen byltyr 100 myń ga jerge sekseýil kósheti otyrǵyzyldy.
Al, 2022-2025 jyldar aralyǵynda jyl saıyn 250 myń ga alańda aǵash otyrǵyzylmaq.
Aıta ketý kerek, bıylǵy kóktem mezgilinde kóshetteý arqyly 12 myń gektarǵa sekseýil otyrǵyzyldy. Qalǵany kúz aılarynda egiledi.
Vıse-mınıstr Aral teńiziniń qurǵaǵan tabanyn ormandy aýmaqqa aınaldyrý jumysynyń josparǵa saı júrip jatqanyn atap ótti.
Sonymen qatar, jergilikti atqarýshy organdarmen birlesip, Araldyń ekologıalyq problemalaryn sheshý jumysyna atsalysýǵa daıyn ekenin jetkizdi.