Bıyl alǵash ret 45 aýdan jáne oblystyq mańyzy bar qalalar ákimderin tikeleı saılaý ótedi. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparat-qa silteme jasap.
«Bıyl alǵash ret 45 aýdan jáne oblystyq mańyzy bar qala ákimderin tikeleı saılaý ótedi. Sodan keıin elimizdegi barlyq aýdan ákimderin saılaıtyn bolamyz. Osylaısha, bıliktiń barlyq ınstıtýttary jańaryp, tyń qarqynmen jumys isteı bastaıdy. Biz saıası úderisti demokratıalandyryp, azamattardyń memleketti basqarý isine qatysý múmkindigin keńeıte beremiz. Bárimiz myna bir óte mańyzdy nárseni túsinýimiz kerek», - dedi Memleket basshysy.
Prezıdent Qazaqstan – osy geosaıası aımaqta túbegeıli reforma júrgizip jatqan birden-bir el ekendigine nazar aýdartty.
«Keıbir adamdar, solardyń ishinde saıasatkerler de bar, osyndaı reformalar Qazaqstanǵa qaýip tóndirýi múmkin dep aıtady. Biraq, men osy ózgeristerdiń barlyǵy, eń aldymen el bolashaǵy úshin aýadaı qajet dep oılaımyn. Alǵan betimizden qaıtýǵa bolmaıdy. Kerisinshe, zań ústemdigi, halyq birligi, áleýmettik ádildik jáne ishki saıası turaqtylyq sekildi irgeli qundylyqtarǵa basa mán bere otyryp, reformalar jolymen alǵa qaraı nyq qadam basýymyz kerek», - dedi Qasym-Jomart Toqaev.