Qazaqstan azamattaryn qyzmetten bosatý deregi tirkelse, tekseriledi
Elge kelgen reseılikterge tek ruqsat etilgen sala boıynsha eńbek etýge múmkindik berilmek. Bul týraly Eńbek jáne halyqty áleýmettik qorǵaý mınıstri aıtty. Tamara Dúısenovanyń aıtýynsha, qazirdiń ózinde 5 myńnan astam reseılik jumys izdep kelgen, dep habarlaıdy Almaty-akshamy.kz Almaty.tv-ge silteme jasap.
Al eger de eldegi kompanıalar syrt memleketten kelgenderdi jumysqa alý úshin óz azamattarymyzdy jumystan bosatsa, zańdy turǵyda shara qoldanylatynyn jetkizdi.
«Eger de bizdiń qazir bizde 8,7 mln adam jumys istep jatyr. sonyń 90 paıyzdan artyǵy Reseıden kelip jumys isteıtin bolsa onda srazý toqtatylady. Jumysqa qabyldaý toqtatylady. Reseılikterge jumys taýyp berý kerek dep tapsyrma berilgen joq. EAEO-tan kelgen azamattar bizdiń shartymyz boıynsha Qazaqstan óziniń halyqaralyq shartyn bárin tolyq oryndaıdy. Bul da Qazaqstannyń mindeti», – dedi QR Eńbek jáne halyqty áleýmettik qorǵaý mınıstri Tamara Dúısenova.
Ulttyq Ekonomıka mınıstri shet elden kelgen azamattar birinshi kezekte qazaqstandyqtar arasynda suranysqa ıe emes jumystarǵa tartylmaq. Ol - maýsymdyq jumystar. Jumysqa qabyldaý kezinde otandastarymyzǵa basymdyq beriledi. Alaıda ózge elden kelýshiler eńbek salasyndaǵy qaýipsizdigimizge qaýip tóndirse, tıisti salada qyzmet etýge shekteý qoıylady.
«Qazaqstandyqtar kóp bara bermeıtin maýsymdyq jumystar bar, máselen, qurylys jumystary sekildi. Árıne, birinshi kezekte biz óz azamattarymyzdy jumysqa ornalastyrýdy oılaımyz. Soǵan basymdyq beremiz», – dedi QR Ulttyq ekonomıka mınıstri Álibek Qýantyrov.
Reseılikterdiń elge kelýi eńbek naryǵynda aıtarlyqtaı básekelestik týdyrady. Osylaı degen Májilis depýtaty Elnur Beısenbaev qonaqjaı halyqty aldymen qaýipsizdik jaǵyn eskerýge shaqyrdy. Onyń paıymynsha, shetel azamattaryna zańnamada kórsetilgen mamandyqtar boıynsha ǵana qyzmet berilýi kerek.
«Týrızm salasynda qyzmet kórsetetin salalar da bolady. Biraq tikeleı memlekettiń táýelsizdigine, onyń qaýipsizdigine nuqsan keletin mamandyq boıynsha eshqandaı sheteldik azamattyń qyzmet jasaýǵa quqyǵy joq», – dedi QR Parlamenti Májilisiniń depýtaty Elnur Beısenbaev.
Kórshi memleketten kelgenderge baılanysty eldegi páter baǵasynyń quny sharyqtap ketkeni belgili. Alaıda bul qymbatshylyqqa memleket kináli emes, - dedi Ádilet mınıstri. Májilis kýlýarynda pikir bildirgen Qanat Mýsınniń aıtýynsha, baǵany ósirip, kúrdeli jaǵdaı qalyptastyrǵan óz azamattarymyz. Jappaı narazylyq uıymdastyratyndaı negiz joǵyn jetkizdi.