70 myń qazaqstandyqqa úıdi jalǵa alý úshin sýbsıdıa berý josparlanǵan.
QR Premer-Mınıstri Álıhan Smaıylov aýyldaǵy 2,8 myńǵa jýyq adam jańa baspanaǵa ıe bolatynyn aıtty, dep habarlaıdy Almaty-akshamy.kz.
«Bıyl, boljam boıynsha, 15 mln sharshy metr turǵyn úı paıdalanýǵa beriledi. Bul 138 myń otbasynyń baspana jaǵdaıyn jaqsartýǵa múmkindik beredi. Jalpy, jyl basynan beri bul salada oń dınamıka qalyptasyp otyr. 5 aıda 4,7 mln sharshy metr turǵyn úı paıdalanýǵa berildi. Bul 39 myń otbasyn jańa baspanamen qamtýǵa jaǵdaı jasaıdy», - dedi Úkimet basshysy birinshi kezekte turǵyn úıdiń baǵasyn qoljetimdi etý mańyzdy ekenin eske salyp.
Álıhan Smaıylovtyń aıtýynsha, endi baspana kezeginde turǵandar úshin turǵyn úıdi bólý «bir tereze» qaǵıdaty boıynsha bir ortalyqtan, ashyq túrde júrgiziletin bolady. Onyń negizgi operatory – «Otbasy banki». Sonymen qatar, azamattardy turǵyn úımen qamtamasyz etýdiń jańa mehanızmderi ázirlendi.
«Onda arendalyq tólemdi sýbsıdıalaý jáne aýyldy jerlerde turǵyn úı salý sıaqty qoldaý sharalary bar. Bıyl jańa mehanızmder esebinen 70 myń azamatqa úıdi jalǵa alý úshin sýbsıdıa berý jáne aýyldy jerlerde 2,8 myńǵa jýyq adamdy jańa baspanamen qamtamasyz etý josparlanǵan», - dedi Álıhan Smaıylov.