Áleýmettik jelide Qýandyq Bıshimbaevtyń ákesi Ýálıhan Bıshimbaev Taraz qalasynda ýnıversıtet ashady degen aqparat tarap ketti.
Ǵylym jáne joǵary bilim mınıstrligi osy aqparatqa qatysty túsinikteme berdi, dep habarlaıdy aqshamnews.kz
Jelidegi aqparatta Bishimbayev University jańa oqý jylynan bastap jumys isteıtini, onyń rektory bolyp Ýálıhan Bıshimbaevtyń ózi taǵaıyndalǵany aıtylady.
Bul týraly pikir bildirgen Ǵylym jáne joǵary bilim mınıstrliginiń qoǵammen baılanys departamentiniń dırektory, baspasóz hatshysy Oljas Berkinbaevtyń sózinshe, Qazaqstan Respýblıkasynyń «Bilim týraly» Zańynyń 5-3-babyna sáıkes, kadrlar daıarlaý baǵyttary men oqytý nysandary boıynsha joǵary jáne joǵary oqý ornynan keıingi bilim berý salasynda bilim berý qyzmetimen aınalysý úshin zańdy tulǵalarǵa lısenzıa jáne (nemese) lısenzıaǵa qosymshany berý – ǵylym jáne joǵary bilim salasyndaǵy ýákiletti organnyń quzyretine jatady.
"Osyǵan baılanysty, joǵary jáne joǵary oqý ornynan keıingi bilim berý salasyndaǵy kez kelgen bilim berý qyzmeti mindetti túrde lısenzıalanýǵa jatady. Qazaqstan Respýblıkasynyń «Ruqsattar jáne habarlamalar týraly» Zańyna sáıkes, ruqsat berý nemese habarlama tártibi belgilengen qyzmetti nemese áreketterdi (operasıalardy) jeke jáne zańdy tulǵalardyń tıisti ruqsat almaı nemese tıisti habarlamany jibermeı júzege asyrýyna jol berilmeıdi.
Joǵaryda aıtylǵandardy negizge ala otyryp, mınıstrlik «Bishimbayev University» ataýymen bilim berý qyzmetin júzege asyrýǵa lısenzıa berilgenin joqqa shyǵarady, sondaı-aq «e-lısenzıalaý» aqparattyq júıesinde tıisti ótinimniń bolmaǵanyn habarlaıdy", deıdi Berkinbaev.