İshki ister mınıstriniń orynbasary, Qylmystyq-atqarý júıesi komıtetiniń (QAJK) tóraǵasy Abaı Qaıyrbekov ulttyq ekonomıkanyń eks-mınıstri Qýandyq Bıshimbaevtyń jazasyn óteý tártibi jaıly aıtty, dep habarlaıdy Aqshamnews.kz tilshisi Tengrinews.kz tilshisine silteme jasap.
Abaı Qaıyrbekovtyń sózinshe, Bıshimbaev túzeý mekemesinde "basqa sottalǵandarmen birdeı jaǵdaıda" otyr.
"Bıshimbaev qylmystyq-atqarý zańnamasynyń barlyq talaptaryna saı, ózge sottalǵandarmen teń negizde jazasyn ótep jatyr", - dedi QAJK tóraǵasy.
Eks-mınıstrdiń eńbekke ornalasýy men tabysyna qatysty suraqqa vıse-mınıstr bul málimetter jeke derekter sanatyna jatatynyn aıtyp, týystary men advokattaryna ǵana beriletinin jetkizdi.
"Jalpy aıtarym: bizdiń mekemelerde sottalǵandardyń shamamen jartysy eńbekke tartylǵan. Bıyl jumyspen qamtylǵandar sanyn 3 myń adamǵa arttyrdyq, bul jumysty jalǵastyramyz", - dedi ol.
Jýrnalıserdiń "Bıshimbaev jeke kamerada otyr ma?" degen saýalyna Qaıyrbekov:
"Aıtqanymdaı, ol jalpy negizde, basqa sottalǵandarmen birge jazasyn ótep jatyr. Atalǵan sottalǵanǵa qandaı da bir erekshe jaǵdaı, jeńildik nemese arnaıy talap qarastyrylmaǵan", - dep jaýap berdi.
Eske salaıyq, ótken jylǵy 13 mamyrda Astanada Saltanat Núkenovanyń ólimine qatysty sot prosesi aıaqtaldy. Ulttyq ekonomıka mınıstrliginiń burynǵy basshysy Qýandyq Bıshimbaev jubaıyn azaptap óltirgeni úshin kináli dep tanylyp, 24 jylǵa bas bostandyǵynan aıyrylǵan edi.