Respýblıka boıynsha barlyq óńirlerde syrqattanýshylyqtyń ósýi baıqalady.
Qazaqstannyń Densaýlyq saqtaý mınıstri Alekseı Soı koronavırýs boıynsha epıdemıologıalyq jaǵdaı kúrdeli ekenin aıtty, dep habarlaıdy Almaty-akshamy.kz.
Mınıstr elimizde KVI boıynsha epıdemıologıalyq jaǵdaı kúrdeli ekenin, birqatar óńirlerdegi kovıdtik stasıonarlarda oryn tolyq ekenin, bul densaýlyq saqtaý júıesiniń shamadan tys júktemesine alyp keletinin málimdedi.
Aldyńǵy eki aptamen salystyrǵanda, sońǵy eki aptada respýblıka boıynsha barlyq óńirlerde syrqattanýshylyqtyń ósýi baıqalady. Syrqattanýshylyqtyń ósýi 1,9 eseni qurap otyr. Maýsym aıymen salystyrǵanda, ortasha táýliktik syrqattanýshylyq 5,2 ese ósti. 1 shildemen salystyrǵanda, elimizde ınfeksıalyq jáne reanımasıalyq tósek-orynmen qamtý 3 ese údemeli túrde óskeni baıqalady, osyǵan baılanysty elimizde tósek qory 1,4 ese ulǵaıtyldy. Aǵymdaǵy jylǵy 28 shildedegi jaǵdaı boıynsha, respýblıka boıynsha ınfeksıalyq tósek-oryndarmen qamtý 53%-dy, reanımasıalyq tósek-oryndarmen qamtý 43%-dy quraıdy. Almaty, Shymkent qalalarynda, Aqtóbe, Túrkistan jáne Qyzylorda oblystarynda ınfeksıalyq jáne reanımasıalyq tósek-ornymen qamtýdyń joǵary qarqyny baıqalady.
«Qazirgi ýaqytta densaýlyq saqtaý júıesi ótken jylmen salystyrǵanda eki ese júktememen jumys isteýde. Ótken jyly syrqattanýshylyq táýligine 2 myń adamǵa deıingini quraǵan bolsa, aǵymdaǵy jyldyń shilde aıynda syrqattanýshylyqtyń ósýi 3 eseden astamdy qurap otyr. Emdelip jatqan pasıentterdiń sany da 2 esege artty», - dedi Alekseı Soı.
Búgingi kúni elimiz boıynsha 90 myńǵa jýyq adam naýqas, onyń 25 myńǵa jýyǵy stasıonarlarda, 65 myńǵa jýyǵy ambýlatorıalyq em alýda. Sonymen qatar, shilde aıynyń basymen salystyrǵanda, aýyr naýqastardyń sany 2,1 ese ósti, 1000-ǵa jýyq naýqas ókpeni jasandy jeldetý apparattaryna qosylǵan. Mınıstrdiń aıtýynsha, birqatar óńirlerde ınfeksıalyq jáne reanımasıalyq tósek-oryn tapshylyǵy oryn alýy múmkin. Táýekel aımaǵynda Nur-Sultan, Shymkent qalalary jáne birqatar oblystar bar.
«Birqatar óńirlerdiń densaýlyq saqtaý júıesi joǵary júktememen jumys isteýde. Búgingi kúni birqatar óńirlerdegi kovıdtik stasıonarlarda oryn tolyq, bul densaýlyq saqtaý júıesiniń shamadan tys júktemesine alyp keledi. Sondaı-aq bul halyqtyń medısınalyq kómekke ýaqtyly qol jetkizýiniń tómendeýine jáne ólimniń, syrqattanýshylyqtyń ósýine jáne ınfeksıanyń odan ári taralýyna alyp kelýi múmkin», - dep habarlady Alekseı Soı.
QR boıynsha jalpy syrqattanýshylyq pen ólimniń 65%-y Nur-Sultan, Almaty, Shymkent, Atyraý, Qaraǵandy qalalarynda tirkelgen. Osyǵan baılanysty 27 shildede Vedomstvoaralyq komısıanyń sheshimimen atalǵan óńirlerde 2 tamyzdan bastap kúshine enetin qosymsha shekteý sharalary bekitildi.
Búgingi kúni QR-da KVI-ge qarsy vaksınanyń birinshi dozasy árbir ekinshi eresek qazaqstandyqqa egiledi. Vaksınanyń 8,6 mln dozasy paıdalanyldy, onyń ishinde 1-shi komponentpen 5 230 750 adam egildi, bul tıisti halyqtyń 52,8%-yn quraıdy. Ekinshi komponentpen 3 436 617 adam qamtyldy. Egý pýnktterinde shamamen 713 myń birinshi komponent jáne 1 mln 300 myń ekinshi komponent bar. Mınıstr naýqastardyń 99,9%-y vaksınalanbaǵanyn, bul ımmýndaýdyń qaýipsizdigi men tıimdiligin rastaıtynyn atap ótti.
«Sondyqtan árbir qazaqstandyqtan vaksınalaý týraly sanaly sheshim qabyldaýdy, ózin, jaqyndaryn qorǵaýdy jáne elimizde ujymdyq ımýnıtetti qalyptastyrýǵa óz úlesin qosýdy suraımyn. Koronavırýstyń turaqty túrde bola beretin mýtasıasy kezinde bul qorǵanýdyń jalǵyz joly», - dedi Densaýlyq saqtaý mınıstrliginiń basshysy halyqqa.
Alekseı Soı búgingi kúni vaksınalaýdyń koronavırýstyq ınfeksıadan bolatyn aýyr aǵym men ólimdi boldyrmaýdyń jalǵyz tıimdi ádisi ekenin taǵy da eske saldy.