Anglıa, Fransıa, Ispanıa jáne birneshe el Qytaıda koronavırýstyń jańa tolqynynyń bastalýyna alańdap, osy elden kelgen áýe jolaýshylary úshin test tapsyrýdy mindettedi, dep habarlaıdy Almaty-akshamy.kz Inform.kz-ke silteme jasap.
Izraıl men Ońtústik Koreıa da qytaılyqtar úshin kovıd shekteýlerin qaıtaratynyn jarıalady. Buǵan deıin AQSH, Úndistan jáne Italıa Qytaıdan kelgen jolaýshylarǵa testti qaıta qolǵa aldy.
Ulybrıtanıa testti 8 qańtardan bastap engizdi. El úkimeti Qytaıdan túsken epıdemıologıalyq aqparattyń jetispeýinen osyndaı sheshim qabyldaýǵa májbúr bolǵan.
Testti tek Anglıa áýejaılarynda kórsetý qajet, alaıda qazirgi tańda Qytaıdan Shotlandıa, Ýels nemese Soltústik Irlandıaǵa tikeleı reıs joq.
Fransıa Qytaıdan kelgen áýe jolaýshylarynan ushýdan 48 saǵat buryn jasalǵan koronavırýs testin talap etedi.
Al Ispanıa vaksınany tolyq alǵan qytaılyqtarǵa elge testsiz kirýge ruqsat etti.
Italıa men Ispanıa bolsa, jolaýshylar elge kelgen boıda áýejaıda vırýsqa synama alady.
Fransıa men Ispanıa pandemıalyq shekteýlerdi qashan qaıtaratynyn naqtylamady.
Qytaı úkimeti kún saıyn bes myńnan astam adam koronavırýs juqtyryp jatqanyn habarlady, biraq kóptegen taldaýshylar bul sannyń tómendetilgenin, shyndyǵynda jańa jaǵdaılar kórsetkishi mıllıonǵa jetedi dep esepteıdi.
Germanıa, Aýstralıa men Portýgalıa jańa antıvırýs sharalary ázirge engizilmeıtinin málim etti.