Almatynyń ortalyq bóliginde urlyq jasaǵan qalta urysy ustaldy
Bostandyq aýdandyq polısıa basqarmasynyń qyzmetkerleri birneshe urlyq jasady degen kúdikpen 35 jastaǵy er adamdy ustady, dep habarlaıdy Almaty-akshamy.kz Polisia.kz-ke silteme jasap.
«Er adam qylmystyq is-áreketin eki jyl buryn bastaǵan. Birinshi aryz 2019 jyldyń mamyr aıynda tirkeldi. Sol kezde ol stomatologıalyq ortalyqta telefondy urlap ketken. Qaskóı keńselerde, kafelerde, barlarda jáne saýda ortalyqtarynda da urlyq jasap júrgen. Jalpy, tergeýdiń osy kezeńinde bótenniń múlkin urlaýdyń 9 faktisi tirkeldi. Jedel izdestirý is-sharalary barysynda kúdikti ustaldy. Ol naqty turǵylyqty jeri joq, 35 jastaǵy B.esimdi er adam bolyp shyqty. Kúdikti uıaly telefondar, noýtbýkter men ámıandardy urlaýǵa mamandanǵan. Jasalǵan qylmystardyń jalpy shyǵyny shamamen 4 mln. teńgeni quraıdy. Qaskóı urlanǵan tehnıkalardy satýdan túsken aqshany óz qalaýy boıynsha jumsaǵan», – dep habarlady Bostandyq aýdandyq PB janyndaǵy polısıa bóliminiń bastyǵy Ǵalymjan Qasymbaev.
Ustalǵan azamat óz kinásin moıyndady jáne anyqtalǵan qylmystarǵa qatystylyǵyn rastady. Barlyq faktiler bir óndiriske biriktirilip, qylmystyq is QR QK-niń 188-baby 3-bóliminiń 2-tarmaǵy boıynsha tergelýde. Kúdiktige “qamaýǵa alý” túrindegi bultartpaý sharasy sanksıalandy.
"Al biz kúdiktiniń osyǵan uqsas basqa da qylmystarǵa qatysy bar-joǵyn tekserip jatyrmyz. İsti tergeýdiń tolyqtyǵy men jan-jaqtylyǵyn qamtamasyz etýge baǵyttalǵan birqatar tergeý áreketteri júrgizilýde, nátıjesinde qylmystyq is sotqa joldanady", – dedi Ǵ. Qasymbaev.