Quttyqtaý jedelhattary áli de kelip túsýde.
Quttyqtaý joldaǵandar arasynda AQSH prezıdenti Djo Baıden, Ózbekstan prezıdenti Shavkat Mırzıóev, Tájikstan prezıdenti Emomalı Rahmon, Ázerbaıjan prezıdenti Ilham Álıev bar.
Naýryz merekesine oraı Qasym-Jomart Toqaevtyń atyna shet memleketterdiń basshylarynan, halyqaralyq uıymdardyń jetekshilerinen quttyqtaý jedelhattary kelip túsýde, dep habarlaıdy Almaty-akshamy.kz Aqordanyń baspasóz qyzmetine silteme jasap.
AQSH Prezıdenti Djo Baıden óz quttyqtaýynda Memleket basshysyna densaýlyq jáne Qazaqstan halqyna baq-bereke tilegen.
"Beıbitshilik pen jańarýǵa úndeıtin bul kúni Qurama Shtattardaǵy jáne búkil álemdegi kóptegen adam osynaý keremet meıramdy Sizben birge toılaıdy. Qazaqstan men AQSH 30 jyldan beri berik ári turaqty seriktestikke negizdelgen dıplomatıalyq qatynastardy jalǵastyryp keledi. Meniń Ákimshiligim halqyńyzdyń ekonomıkalyq, áleýmettik jáne saıası múmkindikterin qalyptastyrýdy kózdeıtin reformalaryńyzdyń baǵdarlamasyna qoldaý kórsetedi. Naýryz qutty bolsyn!" – delingen Djo Baıdenniń jedelhatynda.
Ózbekstan Prezıdenti Shavkat Mırzıóev Naýryz merekesi Ortalyq Azıa halyqtarynyń ortaq maqsaty men armanyn bildiretin meıram ekenin atap ótken.
" Adamzat tarıhynda úlken oryn alatyn osy aıtýly mereke halyqtarymyz ben elderimiz arasyndaǵy dostyq arqaýyn bekemdeýge, yntymaqtastyq pen úılesimdi qatynastardy nyǵaıtýǵa ólsheýsiz úles qosady. Biz eki el arasyndaǵy ózara senim men qurmetke negizdelgen tatý kórshilik baılanystarymyzdy, strategıalyq seriktestigimiz ben odaqtastyq qatynastarymyzdy odan ári keńeıte beretinimiz sózsiz", – delingen quttyqtaý hatta.
Tájikstan Prezıdenti Emomalı Rahmon óz quttyqtaýynda qazirgi kúrdeli áleýmettik-ekonomıkalyq jáne geosaıası jaǵdaıda ózara qurmet pen qoldaýdyń, dostyq pen birliktiń, beıbitshilik pen turaqtylyqtyń, órleý men jasampazdyqtyń bıik maqsattaryna úndeıtin kóktem merekesiniń jalpyadamzattyq qundylyqtarynyń máni arta túsetinin jazǵan.
"Qasterli Naýryz merekesiniń izgi dástúrlerine negizdelgen Tájikstan men Qazaqstan arasyndaǵy dostyq, strategıalyq seriktestik qatynastary halyqtarymyzdyń túpki múddelerine sáıkes aldaǵy ýaqytta da damyp, keńeıe beredi", – dep jazǵan Emomalı Rahmon.
Ázerbaıjan Prezıdenti Ilham Álıevtiń quttyqtaý jedelhatynda Ázerbaıjan men Qazaqstan arasyndaǵy dostyq, tatý kórshilik jáne yntymaqtastyq búginde Naýryz meıramynyń ejelgi dástúrlerin saqtap kele jatqan halyqtarymyzdyń múddesi jolynda odan ári damyp, nyǵaıa túsetinine senim bildirdi.
"Ózimniń jáne ázerbaıjan halqynyń atynan Sizdi jáne halqyńyzdy qasıetti Naýryz meıramymen shyn júrekten quttyqtaımyn. Bul mereke – tabıǵatqa degen sheksiz mahabbat pen úlken qurmettiń belgisi. Myńdaǵan jyldar boıy synaqqa tózip kelgen ómirlik fılosofıanyń nyshany", – delingen quttyqtaý jedelhatta.
Prezıdent Qasym-Jomart Toqaevtyń atyna óz quttyqtaýlaryn Túrki memleketteri uıymynyń bas hatshysy Baǵdat Ámireev, Kavkaz musylmandar basqarmasynyń tóraǵasy, TMD dinaralyq keńesiniń tóraǵalyǵyn qosa atqarýshy sheıh-ýl-ıslam Allahshúkir Pashe-zade, "Shevron" korporasıasy eýrazıalyq bólimshesiniń basqarýshy dırektory Derek Magness, Eýrazıalyq damý bankiniń basqarma tóraǵasy Nıkolaı Podgýzov, Baıqońyr qalasy qalalyq ákimshiliginiń basshysy Konstantın Býsygın jáne basqalary joldady.