Almatyda Dúnıejúzilik kóshpendiler oıyndaryna qatysatyn sportshylardy saltanatty túrde shyǵaryp salý rásimi ótti, dep habarlaıdy aqshamnews.kz.
Megapolıste V Dúnıejúzilik kóshpendiler oıyndaryna qatysatyn almatylyq komandany shyǵaryp salý rásimi uıymdastyryldy. İs-shara barysynda tabıǵattyń tazalyǵy men kúshin beıneleıtin sakraldy sý jiberildi. Sý Aıýsaı sarqyramasynan alynǵan. Rásimge jergilikti bılik ókilderi, sport, mádenıet qaıratkerleri jáne qaladaǵy segiz aýdannyń turǵyndary qatysty.
Sharanyń basty oqıǵasy - «Birlik pen belsendilik kerýeni». Ol Qarmysov pen Sátbaev kósheleriniń qıylysynan bastalyp, Dostyq dańǵylymen Abaı alańyna qaraı júrdi. Qatysýshylar ulttyq kıimder kıip, jarqyn jalaýlarmen bezendirilgen, merekelik atmosfera qalyptastyrdy. Kerýende «Nomad» atty at ústindegi akrobatıkalyq toptyń óneri erekshe nazar aýdardy. Bul kerýen mádenı muranyń mańyzdylyǵyn aıqyndaı otyryp, maqtanysh sımvolyna aınaldy.
- Dúnıejúzilik kóshpendiler oıyndary tek jarys emes, bul kúsh-jigerińizdi, sheberligińizdi jáne tabandylyǵyńyzdy kórsetýge múmkindik beredi. Bizdiń sportshylar úlken daıyndyq jasady. Sizderge sáttilik, ózderińizge degen senimdilik jáne berik rýh tileımin. Daıyndyǵyńyz ben eńbegińiz jemisti bolsyn, jaqyndaryńyz ben búkil komandanyń qoldaýy sizderdi jeńiske jetýge shabyttandyrady. Biz sizderge senemiz jáne Almatyny laıyqty túrde tanytatynyńyzǵa senimdimiz, - dedi «Qyran» qusbegilik federasıasynyń prezıdenti Baǵdat Muptekekyzy.
Rásim halyq mýzykasyn oryndaıtyn ansámblder men oryndaýshylardyń qatysýymen ótken jarqyn konsertpen aıaqtaldy. Qala turǵyndary qazaq mádenıeti men dástúrleriniń baılyǵyn aıqyndaıtyn kórnekti qoıylymdardy tamashalady.