1-mamyr – Birlik kúni
1 mamyr – Qazaqstan halqynyń birligi kúni. Bul ataýly kún dostyq pen tatýlyqty basty baǵdar etken el halqy úshin aıryqsha mánge ıe. Almaty irgesindegi eldimekenderdiń birinde ár ult ókilderi jınalǵan, túrli taǵdyr toǵysqan bir kóshe bar. Berekeli de merekeli bul kóshe – Panfılov aýylyndaǵy Q.Qurmanov kóshesi. Onda qazaqtarmen birge grek, uıǵyr, orys, tatar, túrik ulttarynyń ókilderi bir úıdiń balasyndaı tatý-tátti ómir súrip keledi.
Elimizde santúrli etnos ókilderiniń taǵdyryn tarıhtyń ashshy paraqtary toǵystyrdy deýge bolady. Sonaý asharshylyq pen qýǵyn-súrgin kezeńderi, jappaı deportasıalaý jyldary qazaqtyń keń qushaǵyna álemniń ár halqy kelip panalaǵan edi. Dáýirdiń almaǵaıyp kezeńderinen ótken saıyn solar bir atanyń basyndaı, bir qoldyń salasyndaı ózara baýyr basyp, aralasyp ketken. Biz aıtyp otyrǵan Qurmanov kóshesindegi rıasyz kartına osyny aıǵaqtasa kerek.
Ár otbasynyń óz taǵdyry, óz ómir joly bar. Biraq barlyǵyn biriktiretin qasıet – ózara syılastyq pen dostyq. Aıtýǵa turarlyq eń bir artyqshylyǵy – mundaǵy ár otbasy kórshisin jaqyn týysyndaı qadirleıtini. Ol bolsa kúndelikti qarapaıym is-áreketterden kórinip jatady. Keıde kóshede balalar oınap júrip, velosıpedteri men oıynshyqtaryn umytyp ketse, kórshiler olardy óz úılerine kirgizip qoıady. Eger bireý qaqpasyn ashyq qaldyrsa, ózgeleri únsiz jaýyp ketedi. Kez kelgen ortaq másele bolsa, turǵyndar birlese otyryp sheshedi. Sondyqtan da bul kóshe shynaıy birliktiń mekenine aınalǵan.
Jańarý men izgilik shýaǵy syndy Naýryz merekesi kelgende bul kóshede berekeniń qazany tipti de qaınaı túsedi. Merekelik basqosýlarda kóshe turǵyndary bir qazannan as iship, alqa-qotan otyrysyp, shúıirkelesip tarasady.
Qurmanov kóshesinde zamanaýı jaǵdaı jasalǵan: asfált joldary tegis, túnde kósheni jaryq shamdar nurǵa bóleıdi. Qazir kóshe boıyndaǵy ár aýlada gúlder egilýde. Aınalany kógaldandyrý isine de turǵyndar birge atsalysyp jatyr. Munda ár kóktem – jańa úmittiń, jańa dostyqtyń bastaýy sekildi.
Sofıa men Anastas Deleorıdıster (grek otbasy):
– Biz bul kóshede 50 jyldan beri turamyz. Alǵash kelgende aınala ashyq dala edi. Qazaq halqy bizdi baýyryndaı qarsy aldy, qıyn-qystaý kúnderde qoldaý kórsetti. Sol kúnder úshin alǵysymyz sheksiz. Búginde kórshilerimiz bizge týystaı bolyp ketken. Qýanyshta da, qaıǵyda da birgemiz. Bizdiń basty baılyǵymyz – birlik pen beıbitshilik.
Aıýpjan men Gúlbahram Seskaevtar (uıǵyr otbasy):
– Ultymyz ártúrli bolsa da, júregimiz bir. Bizdiń kóshede eń bastysy – adamnyń ulty emes, onyń adamgershiligi mańyzdy. Túrli jaǵdaılar týyndasa da, bir-birimizge qolushyn berýdi qashanda birinshi orynǵa qoıyp kelemiz. Inshalla, osy bereke-birligimizden aıyrmasyn dep tilek tilep otyramyz.
Rústem men Záýresh Kúrtibaevtar (qazaq otbasy):
– Qazaq jeri túrli ulttardy baýyryna basqan asyl meken. Biz de kórshilerimizben bir shańyraq astynda ómir súrip kelemiz. Ózim medbıke retinde árdaıym kórshilerime kómek qolyn sozýǵa daıynmyn. Bizdiń balalarymyz da ultqa bólinbeı birge oınap, birge ósip keledi. Beıbit ómir men tatýlyqtyń shynaıy kórinisi osy bolar.
TÚIİN: Túrli taǵdyrlar toǵysyp, tatýlyq ortasyna aınalǵan mekende eń bastysy, nıet pen armandar toǵysqan. Mundaǵy turǵyndar dostyq pen ózara syılastyqty ómir zańy retinde qabyldaǵan. Endeshe, 1 mamyr – tek mereke emes, júrekterdiń úndesken kúni. Ártúrli ult ókilderiniń bir kóshede bir otbasydaı tatý ómir súrýi – Qazaqstandaǵy beıbit ómir men kelisimniń jarqyn belgisi. Qurmanov kóshesiniń yntymaǵy ár aýlaǵa, ár kóshege úlgi bolsa eken deımiz.