Áleýmettik jelide otandyq jáne sheteldik shyǵarmalardy nasıhattaýǵa baǵyttalǵan «Birge kitap oqıyq» jobasy bastaldy. Jobanyń shymyldyǵy Ázilhan Nurshaıyqovtyń «Mahabbat qyzyq mol jyldar» romanymen ashyldy.
Ony tanymal bloger-jýrnalıst Sanat İlıas jáne Jańabıke Qabylda júrgizedi. Olar otbasymen birge kitap oqyp, oqyrmandardy osy úrdiske qosylýǵa shaqyrady, dep habarlaıdy aqshamnews.kz.
Ár on kún saıyn kelesi oqylatyn kitap jarıalanyp, kún saıyn onyń oqý barysy men talqylanýy YouTube platformasynda, TikTok, Instagram jelilerinde shyǵyp otyrady. Sońynda kitap avtorymen nemese belgili jazýshy-pýblısıstpen ne bolmasa kitaptaǵy keıipkermen taǵdyrlas adammen suhbat uıymdastyrylady.
Jobanyń maqsaty elimizdiń jáne sheteldik jazýshylardyń týyndylaryn halyq arasynda keńinen nasıhattaý jáne jappaı kitap oqıtyn ultqa aınaldyrý. Sondaı-aq ata-analardy balalarymen birge kitap oqýǵa shaqyryp, otbasylyq oqý dástúrin qalyptastyrý.Balalar men jasóspirimderdiń arasyndaǵy kitap oqýǵa qyzyǵýshylyqty básekege aınaldyrý.
Jobanyń alǵashqy qatysýshysy QR Prezıdentiniń Keńesshisi – Prezıdenttiń Baspasóz hatshysy Berik Ýálı. Ol óz sózinde Qasym-Jomart Kemeluly kitapty kóp oqıtynyn jáne Memleket basshysynyń jappaı kitap oqıtyn ultqa aınaldyrý ıdeıasyna ár adam óz úlesin qosý kerek ekendigin aıtty.
Berik Ýálıuly kelesi oqylatyn týyndyǵa Baýyrjan Momyshuly atamyzdyń «Ushqan uıa» romanyn tańdady. Al «Birge kitap oqıyq» amanatyn odan ári jalǵastyryp kelesi shyǵarmany anyqtaýdy Mádenıet jáne aqparat mınıstri Aıda Balaeva hanymǵa usyndy.
Joba erejesi:
1.Jobaǵa qatysýshy áleýmettik jeli arqyly halyq arasynda on kún boıy talqylanǵan (ózine usynylyp otyrǵan) shyǵarmadan úzindi keltiredi.
2. Unaǵan keıipkeri týraly óz oıyn aıtady.
3. Kelesi oqylatyn kitapty anyqtaıdy.
4. Kelesi oqylatyn kitaptyń 10 danasyn júrgizýshilerge syıǵa tartady. (Bul kitaptar suraq-jaýap jeńimpazdaryna tartý etiledi).
5. Ol týyndydan keıin oqylatyn shyǵarmany anyqtaý úshin «Birge kitap oqıyq» amanatyn kelesi adamǵa usynady.
6. Áriptesterine osy oqylatyn kitap jóninde óz pikirlerin áleýmettik jelide bildirýge keńes beredi.
Kitappen dos bolǵan adam dúnıeniń ǵajabyn tanyp bile alady. Sondyqtan bilimniń kókjıegin tek kitaptan ǵana tabatynymyzdy umytpaıyq.#BirgeKitapOqıyq amanaty jobasynan qalys qalmaı, sizde óz úlesińizdi qosyńyz.