Kókshetaýda alaıaq turǵynnyń Instagram paraqshasynda “balany emdeýge” qarjy jınaǵan, dep habarlaıdy Almaty-akshamy.kz
3 qarashada Kókshetaý qalasy Polısıa basqarmasynyń kezekshi bólimine oblys ortalyǵynyń 36 jastaǵy turǵyny júginip, oǵan tıesili Instagram paraqshasynda bógde adamnyń paıdalanǵany týraly habarlady.
Er adamnyń aıtýynsha, ol oqıǵa týraly týystarynan bilgen, óıtkeni ol sońǵy jyldary bul paraqshamen qoldanbaǵan.
Aldyn ala tergeý barysynda alaıaqtyq maqsatta belgisiz tulǵa birneshe jyl buryn jábirlenýshi jasaǵan akkaýntty paıdalanyp, onda jalǵan aqparat jarıalaǵany anyqtaldy.
Qaskúnem jábirlenýshiniń atynan qoldanýshylarǵa balany emdeýge materıaldyq kómek kórsetý týraly ótinishpen júgingen jáne paraqqa aqsha aýdarý týraly ótinishpen jeke shottyń nómirin ornalastyrǵan.
Qazirgi ýaqytta atalǵan fakti boıynsha QR QK-niń 190-baby 2-bóligi (Alaıaqtyq) boıynsha sotqa deıingi tergeý bastaldy.