Ánshi Toqtar Serikov pen sazger Araılym Mamyrbek arasynda órbigen daýdyń núktesi qoıyldy.
Osy ýaqytqa deıin áleýmettik jelide Toqtar Serikov pen Araılym Mamyrbekke qatysty vıdeo taraǵan bolatyn. Aldymen QR Mádenıet salasynyń úzdigi, sazger Araılym Mamyrbek Toqtar Serikov ánin urlap alǵany týraly «Asyltas.tv» ıýtýb arnasynda málimdedi, dep habarlaıdy Almaty-akshamy.kz.
«Óz basym osy ýaqytqa deıin Toqtar Serikovtyń ónerin jaqsy baǵalaıtynmyn. Ánderin súıip tyńdaıtynmyn. Biraq bir kúni aqpan aıynda onyń konsertin kózim shalyp qaldy. Bir kisi «Mynaý seniń ániń ǵoı» dep salyp jiberipti. Sózin ózgertip tastaǵan. Áýeni aınymaı uqsap tur endi. Jatyp kep telefon nómirin izdedim, tapqan nómirdiń bárine «Myna eki án qalaı uqsap ketken» dep jaza berdim. Ún joq, ekinshi ret qaıta jazǵanda meni buǵattap tastady. Sosyn kómekshisine telefon soǵyp edim, «Ol kisi qazir konsertterden bosamaıdy. Sizben sóılesýge múldem ýaqyty joq» dep jaýap berdi. «Álgi ándi konsertterde aıtpasyn, aldymen menimen kezdesip, osynyń aq-qarasyn ajyratyp alaıyq» dep oǵan aıtyp edim, «Joq, ol ánniń sózi de, áni de Toqtardiki» dep moıyndamady. «Sizdiń ánińiz sonshalyqty hıt pe edi, baıbalam salatyndaı ne kórindi» dep ózime qarsy shyqty», - dedi sazger.
Óner ıesiniń sózine sensek bul ándi 2021-jyly jazylǵan. Keıinnen ánniń sózi unamaı, Svetqalı Nurjanǵa qaıta jazdyrǵan. Osylaısha 2022 jyldyń sáýir aıynda «Baba dala baıany» degen án dúnıege kelipti. Qarajattyń joqtyǵynan án qarasha aıynda elge tanystyryla bastaǵan.
«Sáýir aıynda Toqtar Serikov lám-mım demesten meniń ánimdi «Aýylym» degen atpen búkil platformalarǵa taratyp tastady. Osy jaǵdaıdan keıin meniń júıkem syr berdi. İshimnen shyqqan ánimdi aıdyń-kúnniń amanynda ıemdenip kete salǵany janyma batty, densaýlyǵym nasharlap ketti. Eldiń bári «Sen Toqtardyń ánin urlap aıtyp júrsiń» dep jazatyn boldy. Osydan keıin sotqa shaǵymdanyp, ánimdi ózime qaıtaryp alǵym keldi. Dáleldeýge shamam jetedi, materıaldyq jáne moraldyq shyǵyn talap etemin», - dedi Araılym Mamyrbek.
Araǵa biraz ýaqyt salyp Toqtar Serikov Araılym Mamyrbekti izdep taýypty. Osy ánge qatysty bir ústeldiń ústinde otyryp kelisimge kelgeni jaıynda Araılym Mamyrbek vıdeo taratty.
«Osy bir-eki aıdyń kóleminde ásirese tık-tok, ınstagram jelisinde biz týraly úlken daý-damaı týyp jatyr. Án týraly. Mynaý Araılym degen qaryndasym. Kompozıtor. Birneshe ánderdiń avtory. Ánshi. Ekeýmiz bir elden, bir jerden ekenbiz. Onyń ústine men oqyǵan mektepte oqyǵan eken. Qudaıǵa shúkir! Arnaıy Araılymdy izdep, Esik qalasyna kelip jolyǵyp otyrmyn. Ondaǵy maqsat-múdde bir-aq nárse. Bizdi, Araılymdy da meni de halyq arasynda qaralap jatqandar bar. Aıdyń jaryǵynda án urlapty degen áńgime bolyp jatyr. Joq, Qudaı saqtasyn! Olaı emes. Sezimge eshkim bóget bola almaıdy. Júregimnen shyqqan ándi eshkimge uqsatpaı jazamyn dep oılaıtynmyn. Sóıtsem, bir elden bolǵannan keıin ba, álde bir jerden bolǵanan keıin be, aıtsa adam tańǵalarlyq uqsas Araılym ekeýmizdiń ánimiz óte uqsas jazylǵan eken. Degenmen bul ándi men esh jerden urlap alǵan joqpyn dep betpaqtanyp otyrym alýyma bolady. Joq men qyz balany... Qyz degen atyn syılap, aıaýly ana degen kıeli esimin syılap, qaryndasyma arnaıy kelip jolyǵyp otyrmyn. Jasyratyny joq eki án uqsaıdy. Biraq sózi bólek. Araılym shyǵarǵan ánniń avtory qazaqqa belgili aqyn Svetqalı Nurjan aǵamyz. Al meniń shyǵarǵan ánimdi sózinde áninde men shyǵarǵanmyn dep júrmin. Sondyqtan Araılymnyń aldyna kelip, sóılesip, qaryndasyma muńaıma basyńdy tómen salma. Sen bolashaq án jazýda shyǵar belesiń bar. Jolyń bolsyn dep men úzildi-kesildi ánimdi toqtatamyn. Bul jerde halyq túsinbeı qalmasyn. Alys-beris joq. Aǵa qaryndasty sheshimmen kelisim jasaldy. Júrek aman bolsa talaı án dúnıege keledi, dedi Toqtar Serikov.
Buǵan deıin ánimdi urlady dep málim etken Araılymnyń óner ıesine eshqandaı renishi joq ekendigin aıtty.
Qudaı saqtasyn! Ondaı kereǵar pikirler bolmasa eken. Aramyzda osylaı túsinistik bolyp jatyr. Aǵataıymdy árqashan qoldaımyn. Qaryndas degen tilekshi. Osyǵan deıin de, osydan keıinde basymdy ıip ótem Toqtar aǵamyzdyń Beıbit jeńgemizdiń ónerine. Ary qaraı ónerimiz óristeı bersin! – dedi Araılym Mamyrbek.