Qajy atalardyń jolyn jalǵaǵan túrkistandyq azamattar bir aıda Mekkege jetýdi josparlap otyr.
Túrkistan oblysy, Keles aýdanyna qarasty Aqqorǵan eldi mekeninde turatyn bir top azamat kishi qajylyq paryzyn óteý úshin velosıpedpen jolǵa shyqty, dep habarlaıdy Almaty-akshamy.kz Massaget.kz-ke silteme jasap.
Qarapaıym "Ýral" velosıpedine mingen olar keshe Qazyǵurt aýdany mańyna turaqtaǵan. Al, búgin "Túrkistan-Samara" baǵyty arqyly saparyn jalǵastyrady.
«Mekkege jaıaý barsań, ár qadamyńa saýap jazylady deıdi. Áıtpese, qazir búgin ushaqqa minseń, búgin jetetin múmkindik bar ǵoı. Biz baıaǵy qajy atalarymyzdyń jolyn jańǵyrtyp, osylaı jaıaý-jalpy, velosıpedpen shyǵýdy jón kórdik», - deıdi Japparáli Tashmetov.
Aýyldan 4 adam bolyp shyqqan toptyń qarıasy - ózi. Jasy 60-ty alqymdaǵan. Qasynda balasy jáne taǵy eki týysy bar.
«Ulym Islamnyń jasy 29-da. Al, týystarym Ulan 50-de bolsa, Muzaffar 47 jasta. Ózim 61-ge aıaq bastym. Jolǵa qajetti karta, kompas sekildi zattarymyzdy aldyq. Al, asymyzdy joldan iship jatyrmyz. Keı jerlerde satyp alsaq, keı jerlerde halyq ózderi tamaqtandyryp júr», – deıdi aqsaqal.
Aqsaqal bul saıahatqa biraz ýaqyttan beri daıyndalypty. Alys sapar bolǵandyqtan, velosıped minip, aýyl arasynda shynyqqan. Osy joly áýeli Aqtaý qalasyna baryp aıaldap, Kaspıı teńizi arqyly Túrkıaǵa ótedi eken. Jalpy, jolaýshylar qazirgi jyldamdyqtarymen bir aıda Mekke qalasyna kirýdi josparlap otyr.