Qaraǵandy oblysynda polıseıler iri narkolaboratorıany áshkereledi.
Operatıvtik jumystar men qylmystyq óndiristi joıý barysynda qara naryqqa 500 myńǵa jýyq sıntetıkalyq narkotıkterdiń dozasy túspeı qaldy, dep habarlaıdy aqshamnews.kz
Oqıǵa bylaı bastaldy. Aldymen dachnyı aımaqta aq tústi untaq tárizdes zattan narkotıkter óndiriletin alty bóshke tabyldy. Tergeý barysynda polısıa qyzmetkerleri bul bóshkelerdiń BMW X5 avtokóligine tıelgenin anyqtady, al kóliktiń júrgizýshisi 39 jastaǵy Qaraǵandy qalasynyń turǵyny eken. Er adam bóshkelerdi jeke úıge jetkizbek bolǵan kezde ustaldy.
«Úıde júrgizilgen tintý barysynda 1 tonnadan astam prekýrsor jáne 10 kg-nan asa daıyn álfa-PVP narkotıkteri tárkilendi. Atap aıtqanda, alty aǵash bóshkede prekýrsorlar, psıhotroptyq zatty keptirý prosesinde bolatyn suıyqtyqpen toltyrylǵan 35 áınek poddon, belgisiz suıyqtyq bar 33 kanıstra, untaq túrindegi zatpen toltyrylǵan tórt sómke, bes gazqaǵar, úsh vakýmdy pakette shamamen 3 kg daıyn álfa-PVP narkotıgi, narkotık óndirýge arnalǵan qural-jabdyqtar (mıkserler, vakýmator, metal ventılásıa bólshekteri), tarazylar, mobıldi telefondar, júıelik blok jáne basqa da zańsyz áreketke qatysy bar zattar tabyldy», - dep habarlady QR İİM baspasóz qyzmeti.
Qazirgi ýaqytta kúdikti ýaqytsha ustaý ızolátoryna qamalyp, saraptamalar júrgizilýde.