Mundaı zańsyzdyq Astana qalasynda oryn alǵan.
Bas prokýratýra alqasynyń otyrysynda ortalyq memlekettik organdar basshylarynyń qatysýymen zańsyz kóshi-qonǵa qarsy is-qımyldyń ózekti máseleleri qaraldy, dep habarlaıdy Almaty-akshamy.kz.
Bas Prokýror Berik Asylov kóshi-qon aǵyndarynyń ulǵaıýy jaǵdaıynda kóshi-qondy baqylap qana qoımaı, eldiń ekonomıkalyq jáne áleýmettik damýyna yqpal etetindeı baǵyttaý qajet ekenin atap ótti.
Otyrys barysynda prokýrorlyq tekseristerdiń nátıjeleri baıandaldy.
Alty óńirde (Jambyl, Túrkistan, Soltústik Qazaqstan, Qaraǵandy oblystary, Almaty jáne Astana qalalary) prokýrorlar zańsyz kóshi-qon arnalaryn anyqtap, sotqa deıingi tergep-tekserýdi bastady.
Mysaly, Qaraǵandy oblysynda HQKO, medısınalyq mekemeler men "kómekshiler" dep atalatyn qyzmetkerlerdi qamtıtyn qylmystyq toptyń jumysy toqtatyldy, olar aqsha úshin eńbek sharttaryn, medısınalyq anyqtamalardy qoldan jasap, turǵyn úıdi jalǵan tirkeýdi resimdegen.
Qordaı aýdanynda Jambyl oblysy prokýratýrasynyń úılestirýimen 20 pákistandyqqa shekarany zańsyz kesip ótýdi uıymdastyrǵan Qazaqstan men Qyrǵyzstannyń úsh azamaty ustaldy.
Olardyń biri mıgranttardy kólikpen jáne turǵyn úımen qamtamasyz etken jáne ol sottaldy, qalǵan ekeýine qatysty is sotqa joldandy (M esimdi azamat bas bostandyǵynan aıyrýǵa sottaldy, A jáne O esimdi azamattarǵa qatysty is sotqa jiberildi).
Prokýrorlar jalǵan mekenjaılar boıynsha jáne "rezeńke páterlerde" tirkelgen 22 myń sheteldikti anyqtady.
Astanadaǵy bir páterde sheteldikterdi qosqanda 937 adam tirkelgen, biraq onda bir ǵana otbasy turǵan.
Almaty oblysynda osyndaı 13 myń fakti anyqtaldy.
Tekseris nátıjeleri boıynsha qujattardy qoldan jasaýǵa, shekarany zańsyz kesip ótýge, sot aktilerin oryndamaýǵa jáne basqa da buzýshylyqtarǵa baılanysty barlyǵy 42 sotqa deıingi tergep-tekserý bastaldy.