«Endigi armanym – qytaı tilin úırený»: 6 til biletin túrkistandyq muǵalim jaıly ne bilemiz
24 kz-tiń málimetine sáıkes, Túrkistan oblysy Qazyǵurt aýdanynda ana tilinen bólek, 6 til biletin Smadıar Kárimov esimdi muǵalim turady. Smadıar Kárimov Qalaýbek Tursynqulov atyndaǵy mektep-gımnazıasy dırektorynyń oqý isi jónindegi orynbasary ári aǵylshyn tili páninen sabaq beredi. Ol qazaq, orys, ózbek tilderinen bólek, túrik, arab, káris tilderin meńgergen. Aıtýynsha, arab tilin bala kezinde ákesinen úırense, aǵylshyn, túrik, orys tilderin mektepte oqyp júrgende úırengen.
««Bir tildi úırenseń. bir adamsyń, eki tildi úırenseń. eki adamsyń» degen sıaqty, bir tildi úırenip alsań, ary qaraı ońaı keledi eken ózi», - deıdi Smadıar Kárimov.
Muǵalimniń sózinshe, káris tiline degen qyzyǵýshylyq Koreıaǵa baryp kelgennen keıin oıanǵan.
«Arnaıy oqyǵan joqpyn, ózim izdendim», - deıdi ol.
Zeıindi ustazdyń endigi armany – qytaı tilin úırený. Smadıar Kárimovtiń sózinshe, qansha qıyn bolsa da, nıettengen adam maqsatyna jetpeı qoımaıdy. Sondyqtan ol oqý-bilimge qushtar bolýdyń, tilin úırenýdiń erte-keshi joq degen pikirde.