Qazirgi balalar baqytty. Ne kerektiniń bári bar. Qaıda baramyz demeıdi, Almatyda oıyn-saýyq ortalyǵy jetip-artylady. Esikteri qysy-jazy ashyq. Demalysta balalardy qoldan jasalǵan «Maıamı» teńizine apardyq. Ózińizge asa qyzyq bola qoımasa da, balalar qýansa bolǵany. İshinde talaı keıipker júr.
QYZDAR
Bir qaratory jigit eki qyzyn sýǵa túsirip júr eken. Ekeýi de qýyrshaqtaı, súp-súıkimdi. Bireýi 4-te, ekinshisi 2-de bolar shamasy. Ákesi ekeýin jetektep aparyp kelip júr . «Sharshadym» dedi me eken, kishisin jumsaq oramalǵa tumshalaı orap, jaıly oryndyqtyń arqalyǵyna súıep, kózin jyltyratyp otyrǵyzyp qoıdy. Úlkeni sińlisiniń betinen erkelete súıdi de, ákesimen sýdy betke aldy. Jarasymdy. Analary sender qydyryp kelińder, men úıdegi tirligimdi bitirip alaıyn dedi. Áıtpese, emizýli balasy bar. Júırik oıym solaı dedi. Qyzdaryn aıalaı qurmettep j úrgen jigitke rıza bop otyrdym . Qyz – jat jurttyq. Erteń janyńda dál osylaı júrmeıdi. Sondyqtan qyz balasy qandaı qurmetke de laıyqty!
TOMPAQ
«Hamamǵa» kirdik. İshi bý, eshkimdi anyq kórmeısiz. Biraq bir baýyrsaq balaqaıdy kórip otyrmyn. Rezeńke kózildirigin shekesine emes, mańdaıyna qondyryp qoıypty. Basynda rezeńke qalpaǵy. Bári dop-domalaq balaǵa jarasyp tur. Bala bitkenniń aǵyp turǵan nemese ydystaǵy sýǵa qumar keletini bar ǵoı. «Hamamnyń» kireberisinde tastan jasalǵan ydys bar, oǵan shúmekten sý toltyryp qoıasyń, ishinde temir shaǵyn tostaǵy bar. Álgi tostaqpen sý alyp, otyratyn ornyńdy bir shaıyp alasyń.
Jańaǵy tompaq bala sol shúmektiń janyna jaıǵasqan, temir tostaqty butynyń arasyna qoıyp alyp, ishindegi sýyn shashyp oınap otyr. Odan alyp tóńkerip basynan asyryp quıady kep. Búkil akvaparktiń ishindegi en sý jetpeı jatqandaı.
«Hamamǵa» bir aınalyp taǵy keldim. Ol jer negizi úlkenderge jaqsy, balalar býdy unata bermeıdi. Álgi tompaq taǵy kirip kele jatyr. Qutty ornyna jaıǵasyp alyp, shúmekti saryldatyp qoıdy da, sholpyldata bastady. Arǵy jaǵynda otyrǵan bir er adam: «Eı, sýmen oınama, aǵyza berme!» dep jekip tastady. Bala tynshyp qaldy bir mezet. Sosyn álgi aǵa jaqqa moınyn joǵary, tómen, ońnan, soldan sozyp qaraı bastady. Alǵashynda bul áreketin túsinbeı qalǵam, sóıtsem, álgi qatqyldaý sóılegen aǵanyń kózi ashyq pa, jumýly ma, ashýly ma, basyldy ma, qalaı eken dep baǵamdaǵan túri eken ǵoı. Býdan kóre almaı jatsa qaıtedi endi. Kúldim.
Bir kezde «e, qoıshy» dedi me, temir tostaqpen sý toltyryp aldy da, tóbesinen asyra ústine quıyp jiberip, álgi tostaqty óziniń basyna kıgizip qoıdy. Óz kaıfy ózinde! Mine, bala bolǵasyn sondaı bolýy kerek. Osyndaı erkin ba la lar t abysty bolady bolashaqta dedi bir oıym.
ANA
Hıdjab kıgen áıel úsh balasyn (1, 3, 5 jastar shamasynda) shúpirletip, burqyldap jatqan, massaj jasaıtyn sýǵa alyp keldi. Balalary súp-súıkimdi, moıyndaryna bir-bir balon kıgizip qoıypty. Úsheýi de máz. Astydan syrtqa burqyldap shyǵyp jatqan sýǵa qoldaryn tósep, shyqylyqtap kúlip qoıady eń kishisi. Balasynyń qýanǵanyn kórgen sheshesi de máz.
– Túý, táte, kelgenime qýanyp turmyn. Osynsha aqsha kúndelikti chıpsy, tátti shyrynǵa da shyǵyp ketedi ǵoı. Demalýdy bilmeıdi ekenbiz. Balalarym máz! – dedi rıasyz qýanǵan ana. Basymda oramal, aınalam tolǵan jartylaı jalańash adam demeı, balalardyń qyzyǵy úshin dep kelgen áıelge rıza boldym.
Aınala sýǵa sekirip, salto jasap jatqan balalar, baıqamasań aıaǵy tıip ketýi múmkin. Úsh balasyn, beıne úsh qoly bardaı, janynan jibermeı, moıyndaryndaǵy rezeńke balondarynan ustap alyp, janynda júzdirtip júr álgi kelinshek. Ana degen qandaı!
SELFI
Bir saǵat saıyn tolqyn jiberetin jasandy teńizge keldik. Balalarym sýǵa qoıyp ketti. Men otyrmyn jaǵada. Ádemi bir boıjetken selfı jasap júr eken. Aıaq jaǵy ǵana sý, basqa jeri qurǵaq. Bir kezde bir kishkentaı qyz bala «Dıas jylap jatyr» dep júgirip keldi. Álgi boıjetken aspaı-saspaı, telefonyna olaı bir, bulaı bir tóńkerile qarap, arasynda ernin dúrdıtip qoıyp, selfıletip bara jatty sýdyń ortasynda.
Bir kezde ıegi ıegine tımeı dirildep turǵan, tońǵan, jylap kele jatqan aryq qara balany (inisi bolar) ústindegi súlgisiniń shetinen shymshı ustap beri súırep keledi eken álgi qyz. Ózi sol kúıi áli selfıletip júr biraq. Sý jıegine shyqqan balany «anda otyr» dep buıyrdy da, ózi qaıtadan jaǵadaǵy sýdy aıaǵynyń ushymen aıalaı sıpap, ózin beıne sý ústinde qalqyp júrgendeı sezinip múmkin, odan kamerasyn joǵary kóterip, shashyn súırikteı saýsaqtarymen salalap qoıyp, sosyn ernin dúrdıtti. Jaqsy bir kadrlar shyqqan shyǵar, á «Instaǵa». Ersi eshteńe joq, árıne. Jastarǵa bári jarasymdy. Jastarǵa sulýlyq tán ǵoı.
Biraq álgi aryq qara bala dáý oramaldyń ishinde ıyǵy qýshıyp áli jylap otyr eken, bir jerin soǵyp alǵan-aý, shamasy. Ápkesi keıin ózi balaly bolǵanda túsiner.
SÁLEM
Syrtqa shyqtyq. Esik aldy yǵy-jyǵy halyq. «Aport» aldyndaǵy aport-músinniń aınalasynan atqylap jatqan sýburqaqqa túsip júrgen balalar da óz aldyna máz. Bizdikiler balmuzdaǵyn jep alsyn dep, skameıkaǵa tize búktik.
Jeńil kólikten jas erli-zaıypty tústi. Bir-birine tońteris ekeni kórinip tur. Ekeýin úlkendeý áıel kútip aldy. Kelinshektiń qolyndaǵy balasyn alyp jatqan áıel:
– Nemene, ursysyp shyqqansyńdar ma úıden? – dedi. Kelinshektiń ne aıtqanyn estimedim, tek áıelge ıilip sálem salyp jatqanyn baıqadym. Ádemi! Tógilgen shashy ıyǵyn japqan. Ádemi aı syrǵasy endi batyp bara jatqan kún kózimen bir jalt etti. Boıanǵan, biraq kózge uryp turǵan artyq eshteńesi joq, etek-jeńi molynan pishilgen gúldi kóılegi de kelinshekti kórkem etip tur. Oranbaı-aq, tumshalanbaı-aq, «ıá, ulyńmen ursysyp qaldym» demeı-aq, qalanyń qaq ortasynda da ıilip sálemińdi salyp ımandy, zamanaýı kelin, áıel bolýǵa bolady eken!
Demalysyńyz sátti ótsin, qurmetti oqyrman!