1 aı buryn joǵalǵan Saýrandyq kelinshekke halyqaralyq izdeý jarıalandy, dep habarlaıdy Almaty-akshamy.kz QazAqparat-qa silteme jasap.
Túrkistan oblysy, Saýran aýdandyq polısıa bólimine aryzdanǵan turǵyn 22 naýryz kúni 13:30 shamasynda aýrýhanaǵa ketken qyzy Nazym Aldashtyń qaıta oralmaǵanyn kórsetken. Úıden shyqqanda onyń ústinde ashyq qyzǵysh tústi kúrteshe, aq tústi sporttyq shalbar, aıaǵynda qara tústi aıaq-kıim bolǵan. Jas kelinshektiń jeke basy men túr-tulǵasy boıynsha málimetter sýretimen birge barlyq aýmaqqa joldanǵan. Túrkistandyq polıseıler onyń barýy múmkin aımaqtardy, árbir oryndy jiti tekserip, izdeý jumystaryn kúsheıtti. Sondaı-aq, tártip saqshylary kelip túsken aqparattar boıynsha Jańaqorǵan aýdany, Taraz, Shymkent, Almaty qalalaryna issaparmen shyǵyp, izdestirýde. Sondaı-aq, halyqaralyq izdeý jarıalandy. Búginde bul jumystarǵa eriktiler de tartylyp otyr. «Nazym Baǵdatqyzyn aman-esen taýyp, ony otbasyna qaıtarý úshin tanıtyn, ne bolmasa kórgen-bilgen adamdar bolsa tez arada polısıaǵa habarlasýlaryn suraımyz. Arnaıy belgileri: boıy 165-168 sm, orta deneli, moıyn tusynda qaly bar. İzdeý jarıalanǵan kelinshek týraly qandaı da bir aqparat bolsa, Saýran APB-nyń kezekshi bólimine 8 725 33 5 86 50, 8 747 008 74 80 nemese polısıanyń 102 nómirine habarlasyńyzdar»,- delingen Túrkistan oblysy polısıa departamentiniń baspasóz qyzmeti taratqan habarlamada.