PISA halyqaralyq zertteýleri aýyl mektepterindegi bilim sapasy artyp kele jatqanyn kórsetken.
Elimizde Memleket basshysynyń tapsyrmasymen aýyl mektepteriniń áleýetin arttyrý boıynsha júıeli jumystar júrgizilýde. Osy baǵyttaǵy jumystardyń qorytyndysy týraly oqý-aǵartý mınıstri Ǵanı Beısembaev Úkimet otyrysynda baıandady, dep habarlaıdy aqshamnews.kz.
Mıgnıstrdiń sózinshe, búginde Qazaqstanda 8 myńǵa jýyq mektep jumys jasaýda, onyń ishinde 67%-y aýyl mektebi. Aıta ketý kerek, aýyl mektebiniń árbir ekinshisi - shaǵyn jınaqty.
Oqýshylardyń 40% aýyl mektebinde bilim alady. Sondyqtan úkimet aýyl mektepterin damytý, olardyń materıaldyq-tehnıkalyq bazasyn nyǵaıtý jáne qala men aýyl mektepteriniń arasyndaǵy alshaqtyqty azaıtýǵa asa mán berýde.
«Aýyl men qala mektepteri arasyndaǵy bilim sapasyndaǵy alshaqtyqtyń azaıǵanyn PISA halyqaralyq zertteýleri aıqyndap otyr. Degenmen PISA-2018 nátıjelerimen salystyrǵanda, 2022 jylǵy matematıkalyq jáne jaratylystaný saýattylyǵy boıynsha aıyrmashylyq kórsetkishi 4-5 balǵa deıin qysqardy, al oqý saýattylyǵy ózgerissiz qaldy», - dep atap ótti Ǵanı Beısembaev.
Esterińizge sala keteıik, matematıkalyq saýattylyq boıynsha PISA-2018-de qala mektepteri men aýyl mektepteri arasyndaǵy bilimdegi alshaqtyq – 22 baldy qurasa, PISA-2022-de alshaqtyq 18 balǵa tómendetildi. Jaratylystaný-ǵylymı saýattylyq boıynsha 2018 jyly alshaqtyq 31 baldy qurady, al 2022 jyly ol 26 balǵa deıin azaıtyldy. Osylaısha, halyqaralyq zertteýler aýyl mektepterinde bilim berý sapasynyń artyp kele jatqanyn aıǵaqtaıdy.