Almatyda fransýz tili oqytýdyń ózekti máseleleri talqylandy: halyqaralyq seriktestik pen ınovasıalyq ádister nazarda
Qazaqstan men Fransıa arasyndaǵy strategıalyq áriptestikti damytý maqsatynda Almaty qalasy Bostandyq aýdanynyń №22 mektep-gımnazıasynda «Fransýz tilin oqytýdyń zamanaýı máseleleri, tájirıbe almasý» atty aýqymdy semınar ótti. Bul shara eki el arasyndaǵy bilim berý salasyndaǵy jol kartasyn júzege asyrý aıasynda uıymdastyryldy. Bul týraly Aqshamnews.kz saıty habarlaıdy.
Semınar aıasynda Almaty mektepterinde fransýz tilin oqytýdaǵy ózekti máseleler men olardy sheshý joldary jan-jaqty qarastyryldy. İs-sharaǵa Renne qalasyndaǵy Qazaqstan Respýblıkasynyń qurmetti konsýly Janar Avard-Túrebaeva, EDU Stream halyqaralyq kompanıalar tobynyń dırektory Natalá Mýhamedjanova, «Sanaly Bilim Baspasy» baspasynyń PhD doktory Dana Jantemırova, Bostandyq aýdandyq bilim bóliminiń basshysy Aıgúl Qasymbek jáne aýdan mektepteriniń dırektorlary qatysty.
Aıgúl Qasymbektiń aıtýynsha, semınardyń basty maqsaty – fransýz tilin oqytýda zamanaýı tásilderdi engizý, tabysty tájirıbelermen bólisý jáne oqytýdyń sapasyn arttyrýǵa baǵyttalǵan jańa ádistemelerdi talqylaý. Bul – oqýshylardyń shetel tiline degen qyzyǵýshylyǵyn arttyryp, halyqaralyq bilim standarttaryna saı daıarlaý úshin mańyzdy qadam.
Semınarda №22, №105 jáne №145 mektepteriniń fransýz tili páni muǵalimderi óz tájirıbelerimen bólisip, sıfrlyq tehnologıalardy qoldaný arqyly pándi tıimdi ári qyzyqty túrde jetkizý joldaryn usyndy. Inovasıalyq tásilder, sonyń ishinde ınteraktıvti platformalar men onlaın resýrstardyń mańyzy atap ótildi.
Semınar aıasynda №22 mektep-gımnazıasynda jańa fransýz tili kabınetiniń ashylý saltanaty ótti. Zamanaýı quraldarmen jabdyqtalǵan kabınet oqýshylardyń tildi meńgerý úderisin jeńildetip, olarǵa mádenı turǵydan da jańa kókjıekter ashady. Bul – oqýshylar úshin tek til úırený ǵana emes, Fransıa mádenıetin tereńirek tanýdyń da múmkindigi.
İs-shara barysynda oqýshylar daıyndaǵan «Sýretterimizdegi Fransıa nury» atty shyǵarmashylyq kórme erekshe áser qaldyrdy. Sonymen qatar, fransýz tilinde oqylǵan óleńder men ánder semınar qonaqtarynyń ystyq yqylasyna ıe boldy. №22 mektep-gımnazıanyń 10-synyp oqýshysy, Respýblıkalyq pándik olımpıadanyń fransýz tili boıynsha İİ oryn ıegeri Janel Ten arnaıy quttyqtaýǵa ıe boldy.
Fransýz tilin oqytýǵa arnalǵan bul semınar – Qazaqstan men Fransıa arasyndaǵy mádenı-tanymdyq baılanystardy tereńdetýge baǵyttalǵan mańyzdy bastama. Muǵalimder men bilim salasynyń mamandary úshin tájirıbe almasýdyń osyndaı alańdary oqytýdyń sapasyn arttyryp, halyqaralyq standarttarǵa saı básekege qabiletti urpaq tárbıeleýge múmkindik beredi.