Osydan shırek ǵasyr buryn ataýy men mazmuny kópshilikke beıtanys bolǵan sıfrlyq tehnologıalar búginde barlyq salaǵa tereń enip, sol salanyń qaryshtap damýyna óz septigin tıgizip jatyr. Memlekettegi sıfrlandyrý deńgeıi men onyń azamattarynyń mundaı tehnologıalar týraly saýattylyq kórsetkishi eldiń álemdik arenadaǵy básekelik qabiletin, halyqtyń ál‑aýqatyn aıqyndaıtyn faktorlardyń qataryna endi.
Osyǵan oraı, qarasha aıynda Almaty qalasy Jetisý aýdanynyń №129 jalpy bilim beretin mektebinde «Sıfrlandyrý dáýirindegi qundylyqtar: ınovasıalar bizdiń basymdyqtarymyz baǵa júıesine qalaı áser etedi» taqyrybynda birtutas tárbıe baǵdarlamasyn iske asyrý boıynsha qalalyq semınar uıymdastyryldy.
Oǵan aýdandyq bilim bólimderiniń basshylary, birqatar mektep dırektorlary men olardyń tárbıe jumysy jónindegi orynbasarlary qatysty.
Semınar barysynda qazirgi sıfrlandyrý dáýiri qoǵamymyzdyń barlyq salasyna áserin tıgizý barysy talqylandy. Inovasıalar ómirimizdi jeńildetip, jańa múmkindikter ashyp jatqany sózsiz. Degenmen, bul prosester bizdiń qundylyqtarymyz ben basymdyqtarymyzǵa da yqpal etýde.
Semınardyń negizgi maqsaty – jastar arasynda rýhanı qundylyqtardyń álsireýi, aqparattyń shekten tys kóptigi olardyń durys baǵytty tańdaýda qınalýyna ákelýi. Sondyqtan mektepter men qoǵamnyń mindeti – ulttyq jáne adamgershilik qundylyqtardy saqtaı otyryp, zamanaýı tehnologıalardy durys paıdalana bilýdi úıretý bolyp tabylmaq.
Bizdiń basymdyqtarymyz – bilim men tárbıe arqyly sanaly urpaq qalyptastyrý. Semınardyń nátıjesi ınovasıalar tek tehnıkalyq progres emes, adamgershilik pen rýhanı damýǵa da qyzmet etýi tıis. Sonymen qatar, zamanaýı tehnologıalardy tıimdi paıdalaný baǵytynda jańa usynystar aıtyldy. Bul-bolashaqqa baǵyttalǵan basty qadam.
Jańa júıege pedagogtardyń kózqarasy qalaı? Baǵdarlama ustazdardyń ómirine qandaı ózgeris ákeldi. Pedagogtardyń pikirin tyńdadyq.
Dıdar Serıkova, Almaty qalasy Jetisý aýdany bilim bóliminiń jetekshisi:
– Sıfrlyq tehnologıalarǵa keń maǵynada elektrondy qurylǵylar, júıeler men málimetterdi óńdeıtin baǵdarlamalar jatady. Mundaı jaǵdaıda kompúter men smartfondar, áleýmettik jeliler, jasandy ıntellekt, túrli baǵdarlamalar osy túsiniktiń ishine enedi. Sıfrlyq saýattylyq degenimiz osy tehnologıalardy meńgerý jáne qoldana bilý. Sıfrlyq tehnologıalardyń az merzim ishinde ómirimizdi transformasıalap, kúndelikti tirshiligimizdiń bir bóligine aınalǵany jasyryn emes. Olar eńbek naryǵyn da ózgertip, birqatar mamandyqtardy joıyp, ornyna jańa qyzmet túrleriniń paıda bolýyna ákeldi. Sol sebepti jańa sharttarǵa beıimdi bolý men oǵan qajetti daǵdylardy bilý eń kerekti qasıetterdiń qatarynda qarastyrylady.
Búginde ǵylym men tehnologıa qarqyndy damý jolynda kóptegen jumys oryndaryna barlyq salalarda jańa tehnologıany jetik qoldana alatyn tulǵalar shaqyrylady. Sondyqtan, bul máselelerdi sheshý úshin bilim berý júıesin jańa formatta, sıfrlyq tehnologıalardy qoldaný jolymen damytý mańyzdy. Bilim berý uıymdaryn jappaı sıfrlandyrýdyń mańyzy bolashaq urpaqtyń kez kelgen salada aqparattyq saýattylyǵyn arttyryp, sheberlikterin shyńdap, jan-jaqty iskerligin damytyp, básekege qabiletti etip, bilim keńistiginde óz múmkindikterin tıimdi paıdalanýǵa jaǵdaı jasaıdy. Sonymen qatar, bul – bilim sapasyn arttyrý, oqytý úderisin qoljetimdi etý, muǵalimderdiń, oqýshylardyń, ata-analardyń baılanystaryn jeńildetý turǵysynan da ózekti. Osy maqsatta bilim salasyn sıfrlandyrý jumystary keń qanat jaıyp keledi. Atap aıtsaq, orta mektepterdi jappaı kompúterlendirý, sońǵy modeldegi tehnıkalarmen jabdyqtaý, aqparatty tasymaldaýdyń yńǵaıly joldaryn damytý bolyp sanalady. Bul kontekstte qashyqtan oqytýdyń da osy sıfrlyq júıege jatatynyn aıtyp ótken durys.
Elimizde «Sıfrly Qazaqstan» memlekettik baǵdarlamasy sheńberinde Bilim jáne ǵylym mınıstrligi birqatar mańyzdy jumystar jasaǵanyn aıtyp ótken durys. Respýblıkamyzda muǵalimderdiń sıfrly saýattylyq boıynsha bilimderin keńeıtý jáne arnaıy oqytý kýrstarynan ótýi jolǵa qoıylǵan. Bul kýrstarda ustazdar bilim salasyndaǵy sońǵy jańalyqtarmen, tehnologıalarmen tanysyp, biliktiligin arttyrady. «Sıfrly Qazaqstan» baǵdarlamasy birneshe salaǵa serpin bergenin aıtyp ótken jón.
«Zaman aǵymy bir orynda turmaıdy, árqashan ózgerip, jańaryp otyrady. Onymen birge adamdardyń turmys‑tirshiligi men qajettilikteri de ózgeredi. Jańa qajettilikterge saı mamandar daıarlaý úshin bilim júıesi de transformasıalanyp, ýaqyt aǵymyna ilesip otyrady. Osy jaǵdaıda bilim berý tehnologıalarynyń, formattarynyń ýaqyt ótken saıyn jańaryp, jańǵyrýy qalypty qubylys. Búgin ózekti bolǵan keıbir quraldar men normalar, erteń mańyzdylyǵyn joıady. Mysaly, búgin birtindep damyp kele jatqan vırtýaldy shyndyqtyń bilim berý júıesine enýi, basqa sharttardy talap etedi. Osyndaı ózgermeli álemde memlekettegi bilim salasyna jaýapty sheshim qabyldaýshylardyń mindeti ózektiligi artyp kele jatqan tehnologıalardy erte ańǵaryp, ony basqalardan bir saty buryn engize bilý. Bul azamattardyń da, memlekettiń de básekelik qabiletin kúsheıtedi», - deıdi bizge bergen suqbatynda Jetisý aýdany bilim bóliminiń ádiskeri Gúlsharat Koıshybaıqyzy.
Jalpy, zaman talabyna saı, eńbek naryǵynda básekege qabiletti mamandar daıarlaý úshin bilim berý júıesin sıfrlandyrý óte ózekti degen tujyrym jasaýǵa bolady. Sol sebepti álemniń kóptegen elderi arnaıy baǵdarlamalar qabyldap, zamanaýı tehnologıalardyń bilim salasynda qoldanylýyn keńeıtýge umtylyp otyr. Qazaqstan da bul salada jaǵymdy ózgeristerdiń júrgizilip jatqandyǵy, memlekettik qoldaý men ınvestısıanyń joǵarylyǵy, elimizdiń osy baǵytta álemniń kez kelgen elimen bólise alarlyq tájirıbesi barlyǵy anyqtaldy. Budan otandyq bilim júıesi zamanaýı tehnologıalardy meńgergen, sapaly kadrlar daıarlaýǵa qabiletti degen oı túıindeýge bolady.