Qazirgi tańda Almaty qalasynyń mektepterinde jazǵy demalysty paıdaly ári mazmundy ótkizýdi maqsat etken etnolagerler jumys istep jatyr.
Balanyń demalysyn tıimdi uıymdastyrýmen qatar, olardyń oı-órisin, shyǵarmashylyǵyn damytýǵa baǵyttalǵan bul jobalar ata-analar tarapynan joǵary baǵaǵa ıe bolýda.
Alataý aýdanyndaǵy №196 jalpy bilim beretin mektep janynan ashylǵan «EcoCAMP» atty jazǵy lager – sonyń jarqyn bir mysaly. Mektep dırektory Gúlmıra Búrkitbaıqyzynyń jetekshiligimen júzege asyp jatqan bul jobany bilikti ustaz Aıjan Serikqalıqyzy úılestirýde. Óz isine janashyr uıymdastyrýshylardyń arqasynda lager shyn máninde balanyń jazǵy demalysyn mazmundy bilim men qyzyqqa toly tájirıbelik alańǵa aınaldyryp otyr.
Ata-analardyń aıtýynsha, bul jaı ǵana ýaqytsha oıyn-saýyq alańy emes – balanyń jan-jaqty damýyna arnalǵan erekshe orta. Lagerge qatysqan oqýshylar ár kúnin jańa taqyryppen qarsy alýda. 10 kún – 10 túrli baǵyt: hımıa, astronomıa, ekologıa, bıotehnologıa, robototehnıka syndy ǵylym salalary balaǵa oıyn arqyly tanystyrylady. Balalar óz qoldarymen výlkan jasap, mıkroskoppen zertteý júrgizip, robot qurastyryp, tipti raketa ushyryp kóredi.
Almatylyq ata-ana, Alataý aýdanynyń turǵyny Gúlmıra Bolatqyzy Aqanova bul lagerge erekshe rızashylyǵyn bildirip, redaksıamyzǵa hat jazypty. Onyń qyzy Aıarý Jumaǵazy «Bablgam» atty topta bolyp, erekshe áserli kúnderdi basynan ótkerip jatyr eken. «Biz bala kúnimizde kórmegen tájirıbelerdi qazir balalarymyz kórip, jasap úırenip júr. Bul – úlken jetistik», – deıdi anasy.
Lagerdegi taǵy bir jańashyl joba – «Qazyna kartasy» men «Qazyna tıyny» atty yntalandyrý júıesi. Balalar kún saıynǵy tártibi men belsendiligi, jaqsy áreketteri úshin tıyn alyp, ony arnaıy sandyqqa jınaıdy. Bul – balalardy óz áreketine baǵa berýge, jaýapkershilikke úıretetin tıimdi tásil. Keshkilik keri baılanys kezinde olar ne úırendi, ne unady, qandaı qıyndyq boldy – bárin birge talqylaıdy.
– Balamyzdyń kózi janyp, árbir kúnnen jańa nárse úırenip, shabyttanyp kelgenin kórý – ata-ana úshin eń úlken qýanysh. Osyndaı erekshe formatta jazǵy demalys uıymdastyryp, balalarǵa bilim men qýanysh syılaǵan mektep ujymyna, lager uıymdastyrýshylaryna alǵysymdy bildiremin. Bul biz úshin balalyq shaqtyń eń tátti estelikteriniń biri bolyp qalary sózsiz, – deıdi Aıarýdyń anasy.
Ol tárbıeshilerdiń ár balaǵa jeke kóńil bólip, erkeletip, shabyttandyryp otyrǵanyn erekshe atap ótti.
Lagerge jetekshilik etken Aıjan Serikhalıqyzynyń aıtýynsha, mundaı jazǵy mektepter – tek ýaqyt ótkizý emes, balanyń bolashaǵyna jasalǵan ınvestısıa. «Balalar ǵylymmen, shyǵarmashylyqpen, jańashyl oımen tanysa otyryp, óz-ózine senýdi, óz oıyn jetkizýdi úırenedi. Bul da – úlken ómirge daıyndyq», – deıdi ol.
Kreatıvti ataýlar berilgen toptar – «Bubblegum», «Unicorns», «EcoSarbazdar» – balalardyń qyzyǵýshylyǵyn arttyryp, lager ómirin jarqyn ári umytylmas etti. Ustazdar men tárbıeshilerdiń shyǵarmashylyqpen, mahabbatpen jasaǵan jumysy – ár balanyń júreginen oryn aldy.
Qoryta aıtqanda, №196 mektep janyndaǵy «EcoCAMP» lageri – bilim men tárbıeni, ǵylym men oıyndy, emosıa men damýdy úılestire bilgen biregeı jazǵy joba. Osyndaı lagerler kóptep uıymdastyrylsa, balalar úshin jazǵy demalys tek oıyn emes, ómirlik motıvasıaǵa aınalatyny