«Baqytqa jetkizetin erkin áreket — tamasha áreket»
Ál-Farabı
Memleket basshysy Qasym-Jomart Toqaev «Jańa Qazaqstannyń ekonomıkalyq baǵdary» atty halyqqa Joldaýynda: «Oqý oryndary túlekterge jumys bere alatyn mekemelermen uzaq merzimge arnalǵan áriptestik ornatýy qajet. Ekonomıkanyń basymdyqtaryna, aımaqtyń jáne salanyń erekshelikterine baılanysty tıimdi qarjylandyrý tásilderi kerek» — dep atap ótti.
Bul strategıalyq ustanym elimizdiń joǵary oqý oryndarynyń qyzmetin qaıta qaraýǵa jáne bilim berý men eńbek naryǵy arasyndaǵy baılanysty kúsheıtýge jol ashty. Osy turǵyda elimizdiń jetekshi oqý oryndarynyń biri – ál-Farabı atyndaǵy Qazaq ulttyq ýnıversıteti (QazUÝ) naqty is-sharalardy qolǵa alyp otyr.
QazUÝ – bilim men ǵylymnyń ordasy
Ál-Farabı atyndaǵy QazUÝ – Qazaqstannyń eń iri ári bedeldi joǵary oqý oryndarynyń biri ǵana emes, sonymen qatar halyqaralyq deńgeıde de úlken tanymaldyqqa ıe ýnıversıtet. Bıyl ýnıversıtet óziniń 90 jyldyq mereıtoıyn atap ótti. Bul – oqý ornynyń elimizdiń bilim berý júıesine qosqan úlesin, ǵylymı jetistikterin jáne kadr daıarlaýdaǵy rólin aıshyqtaıtyn mańyzdy kezeń.
1934 jyly qurylǵan ýnıversıtetke aty álemge áıgili ǵulama Ál-Farabıdiń esimi berilgen. Ol – fılosof, matematık, astronom, mýzykant, sondaı-aq túrli ǵylym salalarynda irgeli eńbekter jazǵan uly oıshyl. Ál-Farabıdiń atymen atalýy ýnıversıtetke erekshe rýhanı jáne zıatkerlik maǵyna beredi. Ǵulamanyń «Baqytqa jetkizetin erkin áreket — tamasha áreket» degen sózi búginde stýdentter men ǵalymdar úshin baǵdarsham ispettes.
QazUÝ: bilim, tulǵalyq damý jáne ınovasıa
QazUÝ-da oqý – bul tek akademıalyq bilim alý ǵana emes, sonymen birge tulǵalyq damý men shyǵarmashylyq izdeniske jol ashatyn orta. Zamanaýı tehnologıalarmen jabdyqtalǵan ınfraqurylym, jańartylǵan oqý baǵdarlamalary men halyqaralyq standarttarǵa sáıkes bilim berý tásilderi – stýdentterge tereń bilim men tájirıbe jınaýǵa múmkindik beredi.
Búginde ýnıversıtet elimizdiń strategıalyq baǵyttarymen úndes jumystar júrgizýde. Solardyń biri – kólik-logıstıka salasyn sıfrlandyrý. Memleket bul baǵytty ekonomıkalyq damý draıveri retinde qarastyryp otyr. Joldaýda aıtylǵandaı, Qazaqstannyń bolashaǵy – İT-ınfraqurylymy damyǵan, sıfrlyq múmkindikteri keń memleket bolýynda.
Logıstıka: sıfrlyq transformasıa jáne kadr daıarlaý
Sıfrlandyrý men ınovasıany logıstıka salasyna engizý barysynda negizgi qıyndyqtardyń biri – bilikti mamandardyń jetispeýshiligi. Bul tek tehnıkalyq nemese tehnologıalyq másele ǵana emes, sonymen qatar adamı kapıtaldyń jetkiliksizdigine baılanysty týyndaıtyn júıeli problema. Sonymen qatar, jetkilikti deńgeıde qarjylandyrylmaýy men bıznes ortada sıfrlyq platformalardy paıdalaný deńgeıiniń tómendigi de ózekti máselelerdiń qatarynda.
Osy rette QazUÝ-dyń doktorantýra baǵdarlamasy men úshin tek kásibı biliktilikti jetildirý alańy ǵana emes, sonymen qatar jańa ǵylymı kózqarastar men ınovasıalyq tásilderdi meńgerýge múmkindik beretin mańyzdy platforma.
Bizdiń basty maqsatymyz – alǵan teorıalyq bilimdi naqty tájirıbede qoldana otyryp, Qazaqstandaǵy logıstıkalyq ınfraqurylymdy damytýǵa jáne prosesterdi avtomattandyrýǵa baǵyttalǵan ǵylymı zertteýler júrgizý. Bul salada júrgiziletin zertteýler tek ýnıversıtettik deńgeıde qalmaı, ulttyq deńgeıdegi máselelerdi sheshýge úles qosýy tıis.