Bilim berý uıymdary lańkestik turǵydan osal nysandar qataryna jatady.
QR İİM Ákimshilik polısıa komıteti basqarmasy basshysynyń orynbasary Jasulan Jumanalınniń málimdeýinshe, elimizde bilim berý uıymdaryn lańkestik áreketterden qorǵaý maqsatynda arnaıy nusqaýlyq ázirlenip, bekitildi, dep habarlaıdy Almaty-akshamy.kz.
«Bilim berý uıymdarynda balalardyń qaýipsizdigin qamtamasyz etý mańyzdy. Úkimettiń tapsyrmasyna sáıkes, quzyrly jáne qyzyǵýshylyq tanytqan organdar balalar qaýipsizdigin jetildire túsý jolynda birqatar sharalardy atqaryp jatyr. Atap aıtsaq, Bilim jáne ǵylym mınıstrligi jergilikti ákimdiktermen birlesip bilim berý uıymdarynyń tehnıkalyq jabdyqtalýyn qamtamasyz etýde. Búginde bilim berý uıymdarynda jappaı beınebaqylaý kamerasy men dabyl túımeleri ornatylyp jatyr. Sonymen qatar mekemeniń kire berisine tekserý beketi (týrnıket) qoıylǵan. Odan bólek, mekteptegi qaýipsizdikke jaýapty kúzet uıymynyń lısenzıasy bolýy mindetti», - dedi Jasulan Jumanalın.
Spıkerdiń málimdeýinshe, elimizdegi bilim berý uıymdarynyń deni lańkestik turǵydan osal nysandar qataryna jatady.
«Osy oraıda bıyl naýryzda bilim berý uıymdaryn lańkestik áreketterden qorǵaýdyń arnaıy nusqaýlyǵy bekitildi. Atalǵan nusqaýlyqqa sáıkes, bilim berý uıymdaryn jaraqtandyrý talaptary engizildi. Buǵan deıin biz Bilim jáne ǵylym mınıstrligimen birlesip beınebaqylaý júıesine qatysty talaptardy ázirlegen bolatynbyz. Iaǵnı, bilim mekemelerindegi beınebaqylaý kameralaryn jedel áreket etý ortalyǵymen ıntegrasıalaý kerek», - deıdi ol.