Blıs shahmattan eki dúrkin álem chempıony Bıbisara Asaýbaeva rapıdte básekeniń basty favorıti Sergeı Karákındi jeńdi.
Máskeýde «Shahmat juldyzdary» atty halyqaralyq týrnır ótip jatyr, dep habarlaıdy Almaty-akshamy.kz QazAqparatqa silteme jasap.
Reseılik shahmatshy - álemdegi eń myqty grosmeısterdiń biri. Qazirgi ýaqytta onyń 2 739 upaıy bar.
Týrnır komentatorlarynyń aıtýynsha, Bıbisaranyń blıste álem chempıony bolǵany beker emes. Ol óziniń salqynqandylyǵymen Sergeıdiń myqty qorǵanysyna tótep berip, jeńiske jetti.
Eki myqtynyń oıyny mazmuny jaǵynan da, nátıjesi jaǵynan da týrdyń sánin keltirdi. Bıbisara buǵan deıin suhbattarynda osy týrnırde Sergeı Karákın jáne Teımýr Radjabovpen oınaǵysy keletinin birneshe ret aıtqan.
Óz kezeginde reseılik grosmeıster mundaǵy jalǵyz jeńilisinen uıalmaıtynyn málimdedi.
«Men óte jaqsy oınaıtyn álem chempıonynan utyldym», - dep aıtty Karákın oıynnan keıin.
Aıta keteıik, bul jarystyń júlde qory 15 mıllıon rúbl. Qazir munda álemdegi eń myqty shahmatshylar sheberlik baıqasyp jatyr. Olardyń qatarynda Bıbisara Asaýbaeva, Sergeı Karákın, Aleksandr Grıshýk, Teımýr Radjabov, Raýnaký Sadvanı, Fransısko Valeho, Vladıslav Artemev, Ekaterına Lagno jáne basqalary bar.
Bir qyzyǵy, qazaqstandyq grosmeıster týrnırge qatysatynyn jarys bastalardan eki kún buryn bilgen. Bıbısara álem chempıony Vladımır Kramnıktiń ornyn basqan.
Rapıd básekesi 24-26 qańtarda ótti. Endi blıs túrinde (28 jáne 30 qańtar) Bıbısara Asaýbaeva áli de óz sheberligin kórsetedi dep senemiz.