Megapolıs tórinde Ortalyq Azıa elderiniń kóshbasshy qyz-kelinshekteri, bıikterdi baǵyndyrǵan áıel-analar BeWoman dep aıdar taǵylǵan forýmda bas qosty. Saltanatty jıyn shymyldyǵyn ashqan Almaty qalasy ákiminiń orynbasary Azamat Qaldybekov forým qonaqtary men qatysýshylaryna shahar basshysy Erbolat Dosaevtyń quttyqtaý-lebizin jetkizdi. Aıaýly jandarǵa baqyt, tabys tilep, atalǵan forýmnyń jetistikke jetý, kóshbasshy bolý joldaryn úıretetin, jańa ınovasıalardy usynatyn, áleýmettik progresti jáne teńdik máselelerin talqylaıtyn mańyzdy platforma bolatynyna senim bildirdi.
Al QR Mádenıet jáne aqparat mınıstri, QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń tóraǵasy Aıda Balaeva onlaın-quttyqtaýynda áıel-analardyń qoǵamdaǵy orny týraly aıta kelip, forým jumysyna sáttilik tiledi.
Forýmda Ortalyq Azıa men álemniń 20 memleketinen 50-ge jýyq spıker sóz sóıledi. Úlken aýdıtorıany baýrap alǵandardyń ishinde amerıkalyq kásipker jáne Tesla kompanıasynyń quryltaıshysy Ilon Masktyń anasy Meı Mask, Reseıdiń tanymal jýrnalısi Ksenıa Sobchak, Wildberries marketpleısiniń negizin qalaýshy Tatána Kım bar.
Ózimizdiń otandyq kóshbasshy áıel-analar – «Analar úıi» qoǵamdyq qorynyń atqarýshy komıtetiniń tóraǵasy, IQanat High School of Burabay mesenaty Anar Rahımbaeva, kásipker, dos Community zıatkerlik volonterlik platformasynyń bilim berý jobalarynyń dırektory Jánıa Qurmanova, qazaqstandyq fılantrop, ekolog, qoǵam qaıratkeri, «Sábı» qaıyrymdylyq qorynyń prezıdenti Ásel Tasmaǵambetova qoǵamǵa eleýli paıdasy tıip jatqan áleýmettik jobalarynyń artyqshylyqtaryn, jetistikterin aıtyp berdi. Al áıgili Dımash Qudaıbergenniń anasy, óner qaıratkeri Svetlana Aıtbaeva daryndy bala tárbıeleý qupıasymen bólisse, Bilim media group negizin qalaýshy jáne bas dırektory Raýan Kenjehanuly bıikterdi baǵyndyrýda anasynyń róli qandaı bolǵanyn áserli áńgimelep berdi.
«Ózińizdiń maqsattaryńyz ben súıikti isińizdi tabyńyz», «Jeke brend: ony qalaı jasaý kerek jáne ol sizge ne úshin kerek?», «Kedergilerdi eńserý: armanǵa qalaı jetýge bolady?» sıaqty ondaǵan taqyryptardy qaýzaǵan BeWoman 2024 forýmy tájirıbe almasýǵa jáne kásibı baılanystardy keńeıtýge biregeı múmkindik berdi, sondaı-aq Ortalyq Azıadaǵy áıelderdiń kóshbasshylyq áleýetin ashýǵa jol kórsetti deýge bolady.