Jaqsy adamdar ómirde kóp. Biraq biz kóbimiz olardy baıqamaı jatamyz. Máselen, Qazaqstan Respýblıkasy Ulttyq ulanynyń 3660 áskerı bóliminiń qyzmetshisi efreıtor Tursynbaı Turdybekovtiń jasaǵan erligin eshkim bilmegen jáne ol bul týraly eshkimge aıtpaǵan. Sebebi, ol óziniń adamgershilik áreketin erlik dep sanamaıdy.
Tursynbaı Turdybekovtiń órtke oranǵan úıden bes adamdy aman alyp shyqqanyn áriptesteri Ulttyq ulannyń 3660 áskerı bóliminiń qolbasshylyǵyna Almaty oblysy İle aýdany Boraldaı kentiniń ákimi D. Qońyrbaevtyń atynan kelip túsken hattan keıin bilgen.
Oqıǵa bıyl jazda bolǵan. Saǵat túngi 22:00 shamasynda Boraldaı kentindegi Tynyshbaı kóshesindegi úıden órt shyqqan. Kórshisiniń úıiniń otqa oranyp jatqanyn kórgen Tursynbaı Turdybekov óz ómirine tóngen qaýipke qaramastan, úıde adamdar bar ekenin bilip, bıik qorshaýdyń qaqpasynan ishke sekirip túsedi. Ol temir qaqpany bar kúshimen ashyp, úsh balany, analaryn jáne qart ájeni syrtqa alyp shyqqan.
– Sol kúni men táýliktik kezekshilikten shyǵyp, úıde edim. Demalysymdy paıdalanyp, ákemniń kóligin qarap, aqaýly jerlerin jóndep jatqan bolatynmyn. Kenetten kórshiniń úıiniń shatyry otqa oranyp jatqanyn kórdim de, birden solaı qaraı júgirdim. Syrtqy qaqpa ashylmaı turdy. Oılanbaı, qaqpaǵa órmelep shyǵyp, aýlaǵa sekirip tústim. Úıden kórshimniń áıeli júgirip shyqty. Ol úıde balalar men qart enesiniń baryn aıtty. Men birden úıge kirip, olardy shyǵara bastadym. Qaqpa jalynnyń ystyǵynan qatyp qalypty, biraq men bar kúshimdi salyp, esikti ashyp, otbasy múshelerin syrtqa alyp shyqtym. Osy sátte patrúlde júrgen polısıa qyzmetkerleri de kelip úlgerdi. Budan keıin órttiń kórshi úılerge taralmaýy úshin polısıa qyzmetkerlerimen jáne sol jerde turǵan adamdarmen birigip, qaýipti zattar men kólikterdi shyǵara bastadyq. Órt – tilsiz jaý, jalynyna ıe bermeıdi. Adamdardyń din aman bolǵanyna qýandyq, – deıdi ulandyq efreıtor Tursynbaı Turdybekov.
Áskerı bólimniń qolbasshylyǵy efreıtor Tursynbaı Turdybekovtiń erligi men qıyn jaǵdaıdaǵy batyl áreketin eskerip, ony joǵary qolbasshylyqqa marapattaýǵa usynys berdi.