Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
Merzimi ótken bereshegi bar azamattarǵa kepilsiz tutynýshylyq qaryz ben mıkrokredıtter berýge shekteý engiziledi, dep habarlaıdy Almaty-akshamy.kz
Agenttik Prezıdent tapsyrmasyn oryndaý úshin kepilsiz tutynýshylyq kredıt berýdi retteý boıynsha qosymsha júıeli sharalar ázirlegen.
«Kúntizbelik 90 kúnnen astam merzimi ótken bereshegi bar azamattarǵa kepilsiz tutynýshylyq qaryzdar men mıkrokredıtter berýge shekteýler engiziledi. Bul shara tólem jasaýǵa qabiletsiz qaryz alýshylarǵa jańa kredıt berýdi jáne borysh júktemesiniń ósýin shekteıdi», - dedi Ábilqasymova úkimet otyrysynda.
Sondaı-aq borysh júktemesin shekteý úshin bankterdiń jyldyq tıimdi mólsherlemesiniń shekti mánin qaıta qaraý boıynsha jumys júrgiziledi.
«Halyqaralyq tájirıbege sáıkes, jyldyq tıimdi mólsherleme paıyzdyq marja, táýekel úshin syıaqy, operasıalyq shyǵystar jáne qorlandyrý quny sıaqty naryqtyq faktorlarǵa baılanysty belgilenedi. Tutynýshylyq kredıtter boıynsha syıaqy mólsherlemesiniń tóreligin joıý úshin mıkroqarjy uıymdarynyń tutynýshylyq mıkrokredıtteri boıynsha syıaqynyń shekti mólsherlemelerin retteý qosymsha qatańdatylady», - dedi agenttik tóraǵasy.
Kolektorlar qylmystyq jaýapqa tartylýy múmkin
Ábilqasymovanyń aıtýynsha, kolektorlyq qyzmetti retteýdi qatańdatý úshin naryq sýbektilerine ákimshilik aıyppul mólsherin 2 ese (300 AEK-tan 600 AEK-ke deıin) arttyrýdy, sondaı-aq kolektorlyq agenttikter qyzmetkerleriniń derbes ákimshilik jáne qylmystyq jaýapkershiligin engizýdi kózdeıtin zańnamalyq túzetýler ázirlendi.
«2022 jylǵy qarashada Úkimetke tıisti túzetýler engizildi jáne olar boıynsha belgilengen tártippen kelisý rásimderi júrgizilip jatyr», - dedi ol.
Buǵan qosa, boryshkerlerdi kolektorlardyń zańsyz is-áreketinen qorǵaý úshin bıyl bankter men mıkroqarjy uıymdarynyń jeke tulǵalardyń merzimi ótken bereshekti retteý rásimderi júrgizilmegen kredıtterin satýyna qatysty zańnamalyq shekteýlerdi engizý máselesi pysyqtalady.
Sondaı-aq, kolektorlar satyp alǵan kredıtter boıynsha bereshekti retteý rásimderin júrgizýge mindettelýi múmkin. Agenttik osyndaı zańnamalyq talap engizýdi josparlap otyr.