QR Eńbek jáne halyqty áleýmettik qorǵaý mınıstrliginde memleket qaıratkeri Berdibek Saparbaevty eske alýǵa arnalǵan jıyn ótti. İs-sharaǵa Eńbek jáne halyqty áleýmettik qorǵaý mınıstri Svetlana Jaqypova, vıse-mınıstrler, komıtet tóraǵalary, sala ardagerleri jáne vedomstvonyń qyzmetkerleri qatysty.
Jıynǵa qatysýshylar kórnekti saıasatkerdi eske ala otyryp, B.Saparbaevpen birlese jumys jasaǵan kezdegi jetistikteri, onyń adamı jeke qasıetteri men jalpy elimizdiń jáne óńirlerdiń ekonomıkalyq, áleýmettik-mádenı damýyna qosqan ólsheýsiz úlesi týraly estelikterimen bólisti.
«Berdibek Máshbekuly táýelsiz elimizdiń qalyptasýy men damýy jolynda ólsheýsiz jáne súbeli úles qosqan qaıratker tulǵa edi. Ol óziniń adamı qarapaıymdylyǵy men emen-jarqyn ashyqtyǵy arqasynda el ishindegi bedeldi aqsaqaldar aldynda da, qaramaǵyndaǵy mamandar arasynda da zor qurmetke ıe boldy. Kún tártibindegi kez kelgen máseleniń utymdy sheshimderin oılastyra otyryp, qoǵamdaǵy túrli sanattaǵy ókildermen ortaq til tabysa alatyn. Sol arqyly elimizdegi áleýmettik-eńbek salasyndaǵy josparlardy halyqqa tıimdi etip quryp, kóptegen qyzmetpen memlekettik kómektiń shyn muqtaj adamdar úshin qoljetimdi bolýyn qatań qadaǵalady. Shyn mánisinde, árbir máseleniń jaı-japsaryn tereń uǵynyp, tolyqqandy túsine alý jáne tyńǵylyqty bilý qabileti, tyń jáne aıryqsha oılaý dárejesi, sondaı-aq aınalasyndaǵy adamdarǵa qurmetpen qaraıtyn kózqarasy onyń kóshbasshylyq qasıetin anyqtady», – dep atap ótti Eńbek jáne halyqty áleýmettik qorǵaý mınıstri Svetlana Jaqypova.
Ár jyldary Berdibek Saparbaev túrli memlekettik jáne saıası laýazymdardy atqardy, onyń ishinde egemendi el tarıhyndaǵy respýblıkanyń 5 óńirin basqarǵan birden bir ákim. Budan basqa eki ret QR Eńbek jáne halyqty áleýmettik qorǵaý mınıstri jáne QR Premer-Mınıstriniń orynbasary bolýy B.Saparbaevtyń naǵyz eljandy qaıratker ekenin tanytady.