Barlyq jumystarǵa Úkimet tarapynan qaralatyn jáne jergilikti búdjetten qosymsha bólinetin qarajat jumsalady.
Jambyl oblysynyń ákimi Berdibek Saparbaev Baızaq aýdanyndaǵy jarylys saldarynan búlingen úılerdiń qashan qalpyna keltiriletinin aıtty, dep habarlaıdy Almaty-akshamy.kz QazAqparat-qa silteme jasap.
Jambyl oblysynyń Baızaq aýdanyndaǵy jaǵdaıǵa baılanysty qurylǵan oblystyq jedel shtabtyń músheleri arnaıy mamandarmen birge apattan zardap shekken 3 eldi mekendegi turǵyn úıler men áleýmettik nysandardyń ahýalyn zertteýde. Oblys ákimi Berdibek Saparbaevtyń BAQ ókilderine bergen málimeti boıynsha, ázirge jóndeýdi qajet etetin 118 jyljymaıtyn múlik anyqtalǵan. Onyń 106-sy - turǵyn úı, 12-si - komersıalyq nysan. Jóndeýdi qajet etedi delingen 106 úıdiń 35-ine kúrdeli jóndeý taǵaıyndalyp otyr. Oblystyq jedel shtab qalǵan 71 úıdi jeńil zaqymdaldy dep tanyǵan. «Olar da qalpyna keltiriledi. Barlyq jumystarǵa Úkimet tarapynan qaralatyn jáne jergilikti búdjetten qosymsha bólinetin qarajat jumsalady. Óńirdegi demeýshiler de qarjylaı kómek kórsetedi. Búgin bir úıdiń kúrdeli jóndeý jumystary bastaldy.Qalǵan úılerde qurylysshylar erteńnen bastap iske kirisedi. Eki aıdyń ishinde barlyq úılerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti»,-dedi oblys ákimi. Eske salsaq, Memleket basshysy Qasym-Jomart Toqaevtyń tapsyrmasyn oryndaý aıasynda QR Premer-Mınıstri Asqar Mamınniń ókimimen 26 tamyzda Jambyl oblysynyń Baızaq aýdanyndaǵy oq-dári qoımasynda oryn alǵan órt pen jarylys saldaryn joıý jónindegi Úkimettik komısıa quryldy. QR Premer-Mınıstriniń orynbasary Roman Sklárdyń tóraǵalyǵymen komısıa quramyna Jambyl oblysynyń ákimi Berdibek Saparbaev, qorǵanys mınıstri Nurlan Ermekbaev, tótenshe jaǵdaılar mınıstri Iýrıı Ilın, ishki ister mınıstriniń orynbasary Murat Baımuqashev, eńbek jáne halyqty áleýmettik qorǵaý, densaýlyq saqtaý, ındýstrıa jáne ınfraqurylymdyq damý jáne basqa da ortalyq memlekettik organdardyń vıse-mınıstrleri kirdi. Komısıa aldyna zalaldy baǵalaý jáne órt pen jarylys saldaryn joıý, zaqymdalǵan ınfraqurylymdy qalpyna keltirý, sondaı-aq zardap shekkenderge áleýmettik qoldaý sharalaryn kórsetý boıynsha mindetter qoıylyp otyr.