Estafeta Olımpıadalyq jarystardyń úsh klasterindegi 12 jerde ótedi
2022 jylǵy Beıjińdegi qysqy Olımpıada oıyndarynyń alaý jaǵý estafetasy 2-4 aqpan aralyǵynda ótedi. Bul týraly «Beıjiń-2022» uıymdastyrý komıteti málimdedi, dep habarlaıdy Almaty-akshamy.kz QazAqparatqa silteme jasap.
Estafeta Olımpıadalyq jarystardyń úsh klasterindegi 12 jerde ótedi – Beıjińniń ortalyq bóliginde, Qytaı astanasynyń soltústik-batysyndaǵy Iansın megapolısinde jáne Chjanszákoý qalasynda (Hebeı provınsıasy). Oǵan 1200-ge jýyq adam qatysady.
«Beıjiń-2022» uıymdastyrý komıtetiniń habarlaýynsha, Beıjińdegi qysqy Olımpıada oıyndarynyń Alaý estafetasy koronavırýstyq pandemıaǵa deıingi aldyńǵy olımpıadalardaǵy dástúrli alaý estafetalarymen salystyrǵanda áldeqaıda az kólemde bolady.
«Azaıtylǵan format estafetanyń Qytaı astanasy turǵyndarynyń kúndelikti ómirine áserin azaıtady jáne pandemıanyń aldyn alý jáne baqylaý talaptaryna jaýap bere otyryp, marshrýt boıynsha jappaı jınalýdyń aldyn alady», - dedi «Beıjiń-2022» uıymdastyrý komıteti Bas hatshysynyń orynbasary Súı Chjıszúná.
Beıjińde XXIV Qysqy Olımpıada oıyndarynyń ashylýy qarsańynda Qytaı astanasynyń birqatar aýdandarynda COVID-19 «delta shtamynyń» jáne «omıkron shtamynyń» taralý oshaqtary tirkeldi.
Beıjińde senbidegi jaǵdaı boıynsha koronavırýs juqtyrǵan 34 adam anyqtaldy. Megapolıs bıligi osy jeksenbide 2 mıllıonnan astam adam turatyn Fentaı megapolısiniń turǵyndaryn jappaı testileý naýqanyn bastady, juqtyrǵandardyń eń kóp sany (21 adam) osynda anyqtaldy.
Alaý estafetasy óz jolyn Qytaı astanasynyń ortalyǵynan soltústikke qaraı olımpıadalyq orman saıabaǵynda bastaıdy, sodan keıin qalanyń batysyndaǵy qysqy Olımpıada parki arqyly ótedi, onda uıymdastyrýshylar ýáde etkendeı, alaý robottary Iýndın ózeniniń astynda ot almasady.
3 aqpanda alaý astanalyq Iansın ýezine jetkizilip, onda Uly qytaı qabyrǵasynyń «Badalın» ýchaskesinde bolady, sodan keıin Chjanszákoý qalasyna (Hebeı provınsıasy) barady, onda estafeta Chýnlı ýeziniń «Fýlýn» taý shańǵysy kýrortynda ótedi.
4 aqpanda, qysqy Olımpıada oıyndarynyń ashylý kúninde alaý Beıjińge oralyp, «Iheıýan» jazǵy ımperator saraıynda, Olımpıadalyq orman saıabaǵynda jáne «Grand-kanal» saıabaǵynda bolady.
XXIV qysqy Olımpıada oıyndary Beıjińde 2022 jylǵy 4-20 aqpan aralyǵynda, al Paralımpıada oıyndary 4-13 naýryz aralyǵynda ótedi.