Adamdarǵa syrtqa shyqpaýǵa keńes berildi
Qytaı astanasynda koronavırýs indeti basylǵan joq. Úsh aptada 800-den astam adam kovıd juqtyrǵan, dep habarlaıdy Almaty-akshamy.kz «Habar24»-ke silteme jasap.
Beıjińniń bir aýdany tolyq oqshaýlanǵan, adamdarǵa syrtqa shyqpaýǵa keńes berildi. Shaharda oıyn-saýyq oryndary men kınoteatrlar jabyq, meıramhanalar tek tapsyryspen jumys isteıdi, mektepter men balabaqshalar onlaınǵa aýysty.
PTR synaqtan ótý Qytaı astanasynyń kóptegen turǵyndary úshin kúndelikti ádetke aınaldy. Sáýir aıynyń sońynan bastap Beıjińniń keı aýdandarynda kem degende 10 márte jappaı testileý júrgizildi.
Biz PTR skrınıngtiń kóptegen kezeńderin ótkizdik. Jurttyń sharshaǵanyn túsinemiz. Qala turǵyndarynyń basym bóligi indetke qarsy sharalardy sanaly túrde saqtap, ózara qoldaý kórsetti. Bul úshin alǵys aıtamyz. Bolashaqta PTR testke qatysýǵa túsinistikpen qaraıdy dep úmittenemiz, – dedi Densaýlyq saqtaý komıteti basshysynyń orynbasary Lı An.
Shaharda mektepter men balabaqshalar onlaın jumys istep jatyr. Barlyq oıyn-saýyq ortalyqtary, kınoteatrlar, teatrlar, fıtnes ortalyqtary men saıabaqtar jabyq. İndettiń órshýine baılanysty qalada kólikter aıtarlyqtaı azaıyp, saýda ortalyqtarynda adam sany sıregen. Tek sýpermarketter men syrtqa tamaq satatyn meıramhanalar jumys istep jatyr. Shekteý sharalaryna baılanysty kásiporyndar shyǵynǵa batqan.
Biz qatty qınaldyq. Qazir tamaǵymyzdy tek syrtqa satyp júrmiz, kúnine túsetin tapsyrys sany az. Meıramhanada tamaqtanýǵa tyıym salyndy, – dedi meıramhana ıesi Chjao Hýnmeı.
Jergilikti bılik keıbir kásiporyndar úshin áleýmettik tólemderdi keıinge qaldyrý týraly habarlady. Shaǵyn bızneske de jaldaý aqysy men salyq boıynsha jeńildikter qarastyrylǵan. Alaıda Beıjińdegi ómir qashan qalpyna keletini ázir belgisiz. Onyń ústine qalanyń bir aýdany qalǵan aýdandardan oqshaýlanyp qaldy. Qalalyq kólik jumysy jartylaı toqtap, metro stansıalary jabyldy.