AES – tek energetıka salasynyń nysany ǵana emes, sonymen birge elimizdiń ǵylymı-tehnıkalyq progresiniń jarqyn sımvolyna aınalýǵa tıis. Qazirgi tańda onyń ataýy áli joq. Bul – Qazaqstandaǵy tuńǵysh atom elektr stansıasy bolǵandyqtan, Memleket basshysy Qasym-Jomart Toqaev halyq arasynda úzdik ataý boıynsha ashyq baıqaý jarıalaýdy usyndy.
«Bul saıysqa qatysyp, shyǵarmashylyq qabiletterińizdi kórsetýge shaqyramyn. Bálkim, sheshim qabyldaǵan kezde Sizderdiń de usynystaryńyzǵa súıenermiz», – dedi Prezıdent.
Biz, bul bastamany tolyq qoldaımyz. Bul – tek bir nysannyń ataýyn tańdaý emes, urpaqqa qalar tarıhı muraǵa úles qosý múmkindigi.
Sondyqtan óz tarapymyzdan birneshe nusqasyn usynamyz:
• Jeruıyq Energıasy – qazaq ańyzy men beıbit ómirdiń sımvoly.
• Uly Dala Qýaty – ulttyq brendke aınalatyn, keń dalamyzdyń qýatyn bildiredi.
• SamalAtom – jeńil estiletin, taza energıa men jeldiń tynysyn biriktiredi.
Qazaqstan – ortaq úıimiz. Osy ortaq úıimizdiń energetıkalyq qaýipsizdigin qamtamasyz etetin strategıalyq jobaǵa halyqtyq ataý berý – árqaısymyzdyń azamattyq mindetimiz.
Birge oılanaıyq, birge tańdaıyq, birge damytaıyq!
Rafık Mırzoev,
Qazaqstan kúrdteri qaýymdastyǵy «Barbang» basqarma tóraǵasy