Almatyda «Jibek joly–İİİ» halyqaralyq bilim jármeńkesi ótti
Kórme Túrkıa Respýblıkasy saýda mınıstrliginiń qoldaýymen ótti. İs-sharaǵa Túrkıanyń 12 jeke jáne memlekettik ýnıversıteti men 13 qazaqstandyq ýnıversıtet qatysty. Bul kórmeniń ereksheligi – álemde tuńǵysh ret túrik jáne qazaqstandyq ýnıversıtetter yntymaqtastyq týraly hattamaǵa qol qoıdy.
Bilim jármeńkesiniń maqsaty – mektep bitirýshi túlekter men magıstranttarǵa qos eldiń joǵary oqý oryndaryn tanystyrý. İs-sharanyń ashylýynda Túrkıa Respýblıkasynyń Almaty qalasyndaǵy Bas konsýly Evren Mýderrısoglý men ýnıversıtet rektorlary sóz sóıledi.
Uıymdastyrýshylardyń aıtýynsha, bul jámeńke buryn ótken is-sharalardan erekshe bolmaq. Sebebi, kórmege Qazaqstannan da 13 ýnıversıtet qatysty.
«Joǵary synyp oqýshylary men magıstranttar úshin mańyzdy kórmeni álem boıynsha tuńǵysh ret Almatyda ótkizip otyrmyz. Eki eldiń 25 ýnıversıtetiniń basshylarynyń qatysýymen 250-ge jýyq yntymaqtastyq týraly qujatqa qol qoıyldy. Qos memleket arasyndaǵy ǵylymı baılanysty nyǵaıtýda atalǵan sharanyń mańyzy zor», – deıdi KZ EXPO basqarma tóraǵasy Hasan Ózkarajalar.
Taqyrypqa oraı
Evren MÝDERRISOGLÝ, Túrkıa Respýblıkasynyń Almaty qalasyndaǵy Bas konsýly:
Áleýmettik yntymaqtastyq artady
Joǵary synyp oqýshylary men bakalarvarıat stýdentterine Túrkıada bilim alý týraly aqparat berý jáne Túrkıa men Qazaqstan ýnıversıtetteri arasyndaǵy áleýmettik yntymaqtastyqty arttyrý úshin uıymdastyryldy. Túrik ýnıversıtetteri halyqaralyq arenada jetistikke jetýde. Túrkıa qazirgi ýaqytta eń kóp sheteldik stýdentter oqıtyn álemniń úzdik 10 eliniń qataryna kiredi. Túrkıanyń joǵary oqý oryndarynda 198 elden 350 myńǵa jýyq stýdent bilim alýda. Jyl saıyn Túrkıaǵa álemniń túkpir-túkpirinen bilim izdegen jastar aǵylyp baryp jatady. Osy oraıda, qazaqstandyq baýyrlarymyzdyń da Túrkıada bilim alýy barlyq saladaǵy yntymaqtastyqty nyǵaıtady dep oılaımyn.
Búgingi is-sharaǵa qatysqan ýnıversıtetter óziniń bilim deńgeıi men sapasyn kórsetedi. Aldaǵy ýaqytta bilim berý salasynda zertteýlerge basymdyq beretinimizdi aıtqym keledi. Meniń oıymsha, osy jármeńkege qatysqan ýnıversıtetter qatysýshylarǵa bilim berý baǵdarlamalary men akademıalyq múmkindikterin egjeı-tegjeıli tanystyrdy. Osylaısha eki el arasyndaǵy yntymaqtastyqtyń odan ári damýyna yqpal etedi.
Nurlan TURSYNBEKULY, Abaı atyndaǵy Qazaq ulttyq pedagogıkalyq ýnıversıteti Tarıh jáne quqyq ınstıtýtynyń Áleýmettik isi jónindegi dekanynyń orynbasary:
Jastar múmkindikti durys paıdalanýy kerek
Bizdiń ýnıversıtettiń 4-kýrs stýdentteri Túrkıa Respýblıkasynyń Almaty qalasyndaǵy konsýldyǵynda volonterlik qyzmet atqarady. Solardyń bergen aqparaty boıynsha kelip otyrmyz. Jastarymyz túrik elindegi bedeldi ýnıversıtetterde bilim alýyna jaǵdaı jasalyp jatqanyna qýanyshtymyn. Qazirdiń ózinde Túrkıadan bakalavr, magıstratýra men doktorantýra boıynsha bilim alyp, elge oralǵan mamandar kóp. Máselen, jaqynda tarıh mamandyǵynan 2-3 doktorant PhD doktorlyq dısertasıalaryn qorǵap keldi. Ózderińiz bilesizder, Túrkıanyń eýropalyq eldermen qarym-qatynasy bizge qaraǵanda áldeqaıda jaqsy damyǵan. Shetelde bilim alý múmkindigin durys paıdalanýymyz kerek. 
