Jeńis kúnine 5 kún qaldy. «Baýyrjan shıyrshyǵy»
9 mamyr qarsańynda Mádenıet jáne aqparat mınıstrligi Uly Otan soǵysynda qazaqstandyqtardyń jeńiske qosqan úlesi týraly jazbalar sıklyn jarıalap júr. Búgingi sıkl «Keńes Odaǵynyń Batyry» Baýyrjan Momyshulynyń maıdandaǵy erligine arnalǵan, dep habarlaıdy aqshamnews.kz.
Baýyrjan Momyshuly Uly Otan soǵysy maıdanyna týra Máskeý úshin shaıqastyń qyzǵan kezinde keldi. Ol Almatyda qurylǵan general Ivan Vasılevıch Panfılov basqarǵan 316-shy atqyshtar dıvızıasyna tústi.
Baýyrjan Momyshuly sol kezde ofıserlik shenge ıe bolǵan, sondyqtan birden batalón komandıri qyzmetine taǵaıyndaldy. Al 316-shy dıvızıany tikeleı Máskeýdi qorǵaýǵa jiberdi.
Vermahttyń qatty shabýyly kezinde jaýdy toqtatyp, áskerdiń jeke quramyn saqtap qalý úshin erekshe taktıkalyq amaldar kerek boldy.
Sodan beri «Baýyrjan shıyrshyǵy» dep atalatyn taktıka el esinde qaldy. Onyń máni mynadaı edi: jaýdyń shabýyldaýshy kolonnasyna kenetten soqqy berip, uzaq soǵysqa barmaı, sheginip otyrǵan. Osylaısha jaýdyń kúshi birtindep álsiregen. Sol kezde qaıta soqqy berip, sol soqqy jeńiske jetkizgen.
Jas qazaqtyń taktıkasymen betpe-bet kelgen general Gópner Gıtlerge joldaǵan baıandamasynda bylaı dep jazǵan:
«Eshqandaı soǵys zańdary men erejelerin moıyndamaıtyn, jabaıy dıvızıa. Onyń sarbazdary berilmeıdi, erekshe fanatızmmen soǵysady jáne ólimnen qaımyqpaıdy».
Baýyrjan Momyshuly birneshe ret qorshaýda qalǵan, biraq ár joly áskerin de, oǵan senip tapsyrylǵan bólimderdiń jaýyngerlik qabiletin de saqtap, sátti shyǵa bildi.
«Baýyrjan shıyrshyǵy» búginge deıin AQSH pen Izraıldiń áskerı oqý oryndarynda qorshaýdan shyǵý kezindegi jaýyngerlik is-qımyl úlgisi retinde oqytylady.
Baýyrjan Momyshulyna «Keńes Odaǵynyń Batyry» ataǵy tek 1990 jyly, qaıtys bolǵannan keıin berildi. Ol 1982 jyly dúnıeden ótti.