Almatylyq dárigerler ota jasap, ehınokokk qurtyna toly kısta men alyp ót qabyn alyp tastady
42 jastaǵy er adam Almatydaǵy Qalalyq shuǵyl kómek kórsetý aýrýhanasyna jetkizilgen kezde aýyr halde boldy. Ol ish qýysynda óskin paıda bolyp, ishi úlkeıip ketkenin, álsizdik baıqalyp, qyzýy kóteriletinin, ishiniń jıi-jıi tolǵaq qysqandaı aýyratynyn aıtyp shaǵymdanǵan.
Naýqastyń sózinshe, 2021 jyly tekserý barysynda baýyrdyń oń jaq bóliginde ehınokokk kıstasy bary anyqtalǵan. Biraq ózi ota jasatýdan bas tartypty. Ýaqyt óte kele ishi úlkeıip, ish qýysyndaǵy óskin ósip ketkendikten josparly ota jasaý úshin aýrýhanaǵa jetkizildi. Onyń ústine, óttegi tas, kalkýlezdy holesıstıt pen 28h20 santımetrlik alyp ót qaby jaǵdaıdy qıyndata túsken. 2,5 saǵattyq otany hırýrgter Nurhat Esenbekov pen Dáýren Ábdýalıev, anestezıolog Bella Bajınova, medbıke Lashyn Bolysbaeva qatysqan brıgada jasady.
«Ádette, eresek adamda ót qabynyń uzyndyǵy 7-10 sm, eni 5 sm tóńireginde, sopaqsha nemese almurt tárizdes pishindi bolyp keledi. Al bul naýqastyń ót qaltasy normadan 3-4 ese úlken jáne ish qýysynyń jartysyna jýyǵyn alyp jatty. Mundaı jaǵdaıdy óz basym alǵash ret kezdestirip otyrmyn. Qalyptan tys alyp ót qaby men baýyrǵa jabysqan ehınokokk kıstasy erekshe klınıkalyq jáne patologıalyq jaǵdaı bolyp esepteledi. Odan tek hırýrgıalyq operasıa arqyly ǵana arylýǵa bolady», - deıdi hırýrg Nurhat Esenbekov.
Pasıent otadan keıin jetinshi kúni aýrýhanadan shyqty. Jalpy quny 400 myń teńgeden asyp jyǵylatyn operasıa MÁMS qarajatyna jasaldy.
Esterińizge sala ketsek, baýyr ehınokokkozy – juqpaly parazıtarlyq aýrý. Echinococcus qurty ádette baýyrǵa jabysyp, kısta paıda bolady. Hırýrgıalyq emdi talap etetin bul aýrý ondaǵan jyldar boıy eshbir belgi bermeýi múmkin. Qurtqa toly kıstany ish qýysyna kompúterlik tomografıa jasaǵanda nemese ehınokokqa IFA ádisimen analız tapsyrǵanda ǵana anyqtaýǵa bolady. Sondyqtan ásirese, janýarlarmen jumys isteıtin adamdarǵa jıi qaralyp turǵan jón, deıdi mamandar.
Dárigerler basty problema aýrýdyń óte kesh anyqtalatynynda bolyp turǵanyn, ehınokokk juqtyryp almas úshin qarapaıym tazalyq talaptaryn saqtaý qajettigin aıtady.
«Pandemıadan keıin biz densaýlyǵymyzǵa den qoıa bastadyq. Biraq koronavırýstan da basqa aýrýlar baryn umytpaı, qoldy sabyndap jýyp júrgen abzal», - dep qorytty dáriger.