«Atyraý» gazetine – 100 jyl
Alǵashqy sany 1923 jyly «Erik» degen ataýmen jaryq kórgen basylym osy aralyqta «Qurmet belgisi» ordenimen marapattalyp, Búkilodaqtyq syılyqqa da ıe bolǵan. Ǵasyrlyq mereıtoıǵa oraı Atyraý qalasynda aýqymdy jıyn ótti. Oǵan elge tanymal qalamgerler men ardager jýrnalıser, sondaı-aq Almatydan arnaıy barǵan «Alatau Aqparat» medıaholdınginiń Bas dırektory Erjan Qalymbaıuly qatysty.
Gazettiń alǵashqy sany «Erik» degen ataýmen 1923 jyly sáýirdiń 1-i kúni shyqty. 1924 jyly 23 tamyz – «Jumysker tili», 1930 jyldyń qyrkúıeginen «Jem jumysshylary», 1932 jylǵy sáýirden – «Lenın joly», 1933 jylǵy qyrkúıekten – «Sosıalıstik qurylysqa», 1933 jylǵy 5 qarashadan – «Sosıaldy qurylys», 1963 jyldyń mamyrynan – «Komýnıstik eńbek» degen ataýmen, al 1990 jylǵy maýsymnyń 30-ynan beri «Atyraý» degen ataýmen shyǵyp keledi. Uzaq jyl boıy aptasyna 5 ret shyqqan gazet sońǵy jyldary aptasyna úsh ret shyǵady.
«Atyraý» gazeti – elimizdiń batys ólkesindegi alǵashqy ulttyq basylymdardyń biri. Gazettiń negizin qalap, materıaldyq bazasyn jasaqtap, alǵashqy nómirlerin shyǵarǵan – 1923 jyly Gýrev ýezik partıa komıtetiniń birinshi hatshysy bolǵan Tólepkereı Óteýlıev. Gazettiń alǵashqy sanyndaǵy bas maqalanyń avtory da sol kisi edi. «Tirlik osymen tabylady» dep atalǵan maqalada negizgi oı «Halyqtyń oqý-biliminiń mańyzy, erikti el bolýdyń basty sharty – onyń saýattylyǵynda» degenge saıady. Oblystyq gazet óziniń búkil tarıhynda osy oıdy jan-jaqty nasıhattaýmen keledi. 2000 j. basynda gazet taralymy 10 myń bolsa, búginde taralym 26 myńnan asty.
Únqaǵaz tarıhy óte baı. Kezinde Ábý Sársenbaev, Asqar Toqmaǵambetov, Sábıt Muqanov, Ǵabdol Slanov, Hamıt Erǵalıev, Jumeken Nájimedenov, Berqaıyr Amanshın maqala-óleńderi men áńgimelerin joldap turǵan. Gazette Taýman Amandosov, Meńdekesh Satybaldıev, Farıza Ońǵarsynova, Marat Ysqaqov, Berik Qorqytov, Amanqos Ershýov syndy belgili ádebıetshi, jazýshylar jumys istep, qanattandy. Nurıden Muftahov, Tilek Dáýletov, İzimbergen İsqojın syndy respýblıkaǵa tanymal jýrnalıser, álem klasıkterin qazaq, qaraqalpaq tilderine alǵashqy aýdarǵan Júsip Jantórın, Qydyrǵalı Sasyqov syndy ertede elge tanylǵan aýdarmashylar jumys istedi.