Eki adam Aqsaı qalasy jaǵyna qaraı traktormen jolǵa shyqqan
Batys Qazaqstan oblysynda sý tasqyny kezinde er adam kóz jumdy, dep habarlaıdy Almaty-akshamy.kz QazAqparatqa silteme jasap.
BQO TJ departamentinen túsken málimetke qaraǵanda, Shyńǵyrlaý aýdany Aqtaý aýylynan 11 naýryz kúni saǵat 19.00-de 1984 jáne 1977 jylǵy eki er adam Aqsaı qalasyna qaraı traktormen shyqqan.
14 naýryz kúni saǵat 17.17-de olardyń joǵalyp ketkeni jóninde habar túsken. Sol kezde Bórli aýdanynda sý tasqyny oryn alǵany málim. Saǵat 23.25-te Aqsaı qalasynan QPO b.v. kompanıasynyń jol talǵamaıtyn kóligi izdeýge shyqqan. Alaıda jol bolmaǵandyqtan, saǵat 03.00-de izdeý toqtatylǵan.
BQO polısıa departamentiniń baspasóz qyzmetkeri Darıǵa Májıtovanyń aıtýynsha, atalǵan er adamdar Aqtaý aýylyna járdem berýge baryp, keri qaıtqan kezde, traktor balshyqqa batyp qalǵan. Bireýi kómek izdep ketken de, ekinshisi, 1984 jylǵy er adam, aıaǵy aýyrǵandyqtan, kútip qalǵan.
«15 naýryz kúni Bórli aýdany Aqbulaq aýylynan 9 shaqyrym jerde ashyq daladan 1984 jylǵy er adamnyń múrdesi tabyldy. Onyń denesinde zorlyq-zombylyq belgileri bolǵan joq. Atalǵan derek adam ólimi retinde tirkeldi. Saraptama júrgizilýde. Bastapqy sebebi – sýǵa ketken», - dedi D.Májıtova.
BQO densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, ekinshi er adam Bórli aýdandyq aýrýhanasynyń terapevtik bólimshesinde jatyr. Oń jaq ókpesi qabynǵan. Jaǵdaıy ortasha aýyr.