Turǵyn úıler men aýla aımaqtardan 57 myń tekshe metr erigen qar sýy soryldy
Kúnniń kúrt jylynýy saldarynan elimizdiń barlyq óńirlerinde sý tasqyny qaýpi bar. Búgingi tańda Batys Qazaqstan, Aqtóbe jáne Pavlodar oblystarynda jaǵdaı kúrdeli. Elimizde qalyptasqan sý tasqyny jaǵdaıyna baılanysty TJM men óńirlerde jedel shtabtar jumys júrgizýde, dep habarlaıdy Almaty-akshamy.kz.
«Batys Qazaqstan oblysyna erigen qar sýyn soryp shyǵarý úshin Mańǵystaý oblysynan qosymsha kúshter men quraldar jiberildi. Olardyń jalpy sany - 43 adam, 4 birlik tehnıka men 6 sý sorý quraly»,-delingen QR TJM baspasóz qyzmeti taratqan málimette.
Quzyrly vedomstvo málimetinshe, Batys Qazaqstan oblysy Qaratóbe aýdanynyń Shalǵyn kentinde jáne Bórili aýdanynyń Qyzyltal aýylynda 37 jeke turǵyn úı men eki áleýmettik nysandy qyzyl sý basty. TJM jáne jergilikti atqarýshy organdardyń kúshteri 87 adamdy qaýipsiz jerge evakýasıalady. Búgingi kúni Batys Qazaqstan oblysynyń eldimekenderinen 1 mln 156 myń tekshe metr qar shyǵaryldy. Turǵyn úıler men aýla aımaqtardan 57 myń tekshe metr erigen qar sýy soryldy.
«Sondaı-aq, mınıstrliktiń habarlaýynsha, Pavlodar oblysynda Rojdestvenka aýylyndaǵy eki jeke turǵyn úıdi qyzyl sý basty. Búgingi kúni turǵyn úıler men aýla aýmaqtarynan 56 500 tekshe metr sý soryldy, eldimekenderden 795 myń tekshe metr qar shyǵaryldy»,-delingen habarlamada.
Aqtóbe oblysynda 47 aýla aýmaqty qyzyl sý basty. Eldimekenderden 345 myń tekshe metr qar shyǵaryldy. Turǵyn úıler men aýla aýmaqtardan 5 808 tekshe metr sý soryldy. Sonymen qatar, Aqtóbe oblysynda segiz avtojol ýchaskesinde qyzyl sý tasyp jatyr. Aqtóbe jáne Batys Qazaqstan oblystarynda bir respýblıkalyq mańyzy bar avtojol ýchaskesi men 15 jergilikti mańyzy bar avtojoldardyń ýchaskesin sý shaıdy. Barlyq ýchaskelerde polısıa qyzmetkerleri men jergilikti atqarýshy organdardyń kezekshiligi uıymdastyryldy.
Osy jumystarǵa TJM, İİM jáne jergilikti atqarýshy organdardan barlyǵy 621 adam, 289 birlik tehnıka jumyldyrylǵan.