Almatyda Túrksib aýdanynyń sáýletshisi Almas Manıarov qalanyń Bas josparyna engizilip jatqan ózgerister aıasynda aýdandy damytýdyń negizgi jobalary týraly aıtty, - dep habarlaıdy Aqshamnews.kz.
Onyń aıtýynsha, Túrksib aýdanynda iskerlik, áleýmettik jáne demalys qyzmetterin biriktiretin jańa «Shyǵys qaqpasy» polıortalyǵyn qurý kózdelgen. Bul polıortalyq megapolıstiń ósý núkteleriniń birine aınalmaq. Sonymen qatar, aýdanda halyqaralyq deńgeıdegi sport stadıonyn salý josparlanyp otyr.
«Aýdanymyzda «Shyǵys qaqpasy» polıortalyǵyn damytý qarastyrylǵan. Budan bólek, halyqaralyq deńgeıdegi stadıon salý josparlanyp otyr. Onyń mańynda áleýmettik, mádenı jáne demalys nysandary, sondaı-aq zamanaýı turǵyn úı keshenderi boı kóteredi. Sáýlettik stıl qatań saqtalyp, turǵyn úıler joǵary standarttarǵa saı bolady», — dedi Almas Manıarov.
Sondaı-aq, ol joba aıasynda Seıfýllın kóshesinen bastap temirjol vokzalyna deıingi aýmaqta eski turǵyn úılerdi jańartý, mektepter, balabaqshalar men emhanalar salý, sondaı-aq kóshe-jol jelisin damytý kózdelgenin málimdedi. Atap aıtqanda, Hmelnıskıı kóshesin Qulja tas jolyna deıin uzartý josparlanǵan. Rysqulov dańǵylynan áýejaı mańyndaǵy kólge deıingi aýmaqty kóriktendirip, serýendeý aımaǵy men qoǵamdyq keńistik qurý da josparǵa engen.
Almas Manıarovtyń aıtýynsha, Bas jospardy túzetý qala úshin mańyzdy. Bul Almatynyń ortalyq bóligin ǵana emes, tómengi aýmaqtaryn da birdeı damytýǵa, megapolıstiń barlyq bóliginde ómir súrýge jáne jumys isteýge qolaıly jaǵdaı jasaýǵa múmkindik beredi.